உங்களது ரத்த வகை எது? அதற்கேற்ற உணவு எது?

4 கருத்துகள்

ந்த பதிவின் நோக்கம், சைவ உணவின் முக்கியத்துவம் குறித்து தான். உலகம் முழுவதிலும் அசைவ உணவுக்கு மாற்றான இயக்கங்கள் எழுந்து வருகின்றன. காரணம்,மனித பரிணாம வளர்ச்சியில் அவனது இயற்கை உணவு என்பது தாவரங்கள் மட்டுமே. இறைச்சி என்பது விலங்கு உலகத்திற்கு படைக்கப்பட்டது. இதில் எது சரி. எது தவறு என்பது குறித்து ஆய்வுகள் நடந்து வருகின்றன. அது ஒரு பக்கம் இருக்கட்டும். சைவ உணவு மட்டுமே மனிதனுக்கு பொருந்திய உணவு என்பதில் மாற்றுக்கருத்து இருக்க முடியாது.

காய்கறிகள் என்ற மரக்கறிகள் எளிதில் செரிக்க கூடியது. மனித உடலின் இயங்கு மண்டலத்திற்கு தேவையான சக்திகள் அனைத்தும் சைவ உணவில் அதிகமாகவே இருக்கின்றன. இவை மட்டுமே மனித உடலின் செரிமான மண்டலத்திற்கு பொருந்தி போக கூடியவையும் கூட. இருந்தாலும் சில நேரங்களில் மாமிச உணவும் பொருந்தி தான் போகிறது. ஆனால் அளவோடு உண்டால் அது மருந்தாக அமைகிறது.

 சரி, எந்த இரத்த வகையினருக்கு எந்த மாதிரியான உணவு முறை பொருந்து என்று பார்க்கலாம். அதாவது, இரத்தத்தின் வகை என்பது கார, அமில நிலைப்பாடுகளை பொருத்து அமைகிறது. செவ்வாய் தோஷம் உள்ள பெண்ணுக்கு செவ்வாய் தோஷம் உள்ள ஆண் தான் பொருத்தமாக இருக்கும் என்பார்களே..அது ஏன்? இரத்தத்தின் தன்மையை வைத்துதான் இந்த முடிவுக்கு வந்திருக்கிறார்கள் என்பது தான் உண்மை.

ஆக..இரத்தத்தின் தன்மைக்கு ஏற்றபடி அமில, காரத்தன்மையுள்ள உணவு வகைகளை உண்டால் அது நமது செயல் திறனை அதிகரிக்கும். ஆரோக்கியமான உடலை தரும். இந்த பதிவில் எந்த இரத்த வகை கொண்டவர்களுக்கு என்ன மாதிரியான உணவுகள் பொருந்தும் என்று பார்க்கலாம்.

'ஏ' பிரிவு இரத்த வகை
இவர்களுக்கு சைவ உணவு மட்டுமே பொருத்தமானது. புத்தம் புதிய காய்கறிகள்,கீரை வகைகளை இவர்கள் அதிகமாக உணவில் சேர்த்துக் கொள்ள வேண்டும். பீன்ஸ் மற்றும் பயறுவகைகளில் அதிகமான புரதச்சத்து உள்ளது. அவை இவர்களுக்கு இதய நோய்கள், புற்றுநோய்,நீரிழிவு போன்றவை ஏற்படுவதை ஓரளவு தடுக்கும். 'ஏ' இரத்த பிரிவு கொண்டவர்களுக்கு மேற்கண்ட நோய்கள் ஏற்படும் சூழ்நிலை அதிகம் இருப்பதாக சொல்லப்படுகிறது. இந்த இரத்த வகை கொண்டவர்கள் பால் மற்றும் பால் சார்ந்த பொருட்களை தவிர்ப்பது நலம். இவை இவர்களுக்கு எளிதில் சீரணம் ஆவதில்லை. முட்டைக்கோஸ், தக்காளி, உருளைக்கிழங்கு,மிளகு போன்றவற்றில் இருக்கும் 'லெக்டின்' என்ற பொருள் இவர்களின் வயிற்றுக்கு தொந்தரவை தரும்.

'பி' இரத்த வகை
மிதமான மென்மையான உணவுகளே இந்த வகை இரத்த பிரிவு கொண்டவர்களுக்கு ஏற்றவை. பழம், காய்கறிகளை இவர்கள் அதிகமாக சாப்பிடலாம். பாலும், பால்வகை பொருட்களும் உடலுக்கு உகந்தவை அல்ல. தக்காளி அதிகமாக சாப்பிட்டால் வயிற்றுக் கோளாறுகளை உருவாக்கும். சோளம், கோதுமை,பயறு வகைகள்,வேர்க்கடலை சாப்பிட்டால் இவர்களின் உடல் எடை அதிகரிக்கும். இவற்றில் இருக்கும் சில ரசாயனங்கள் இந்த ரத்த பிரிவுகாரர்களுக்கு மந்தம், சோர்வை உருவாக்கும்.

'ஏ'பி' பிரிவு இரத்த வகை
இந்த பிரிவு இரத்தம் இருப்பவர்கள் இறைச்சி உணவை அதிகம் உண்பது கூடாது. இவர்களது வயிற்றில் உணவை சீரணம் செய்யும் அமிலச்சுரப்பு குறைவாக இருப்பதுண்டு. அதனால் சீரணம் மெதுவாக நடக்கும். குறிப்பாக இவர்கள் கோழி இறைச்சியை உண்பது கூடாது. பால், வேர்க்கடலை மற்றும் பருப்பு வகை பொருட்கள், தானியங்களை உணவில் சேர்த்துக் கொள்ளலாம். ஆனால் கோதுமையை அதிகம் சேர்க்க கூடாது. இந்த இரத்த பிரிவு கொண்டவர்களுக்கு அதிகமாக சளித் தொந்தரவு இருக்கும். காலையில் இளம் சுடுநீரில் பாதி எலுமிச்சை பழத்தை பிழிந்து வெறும் வயிற்றில் குடித்தால் சளி தொந்தரவு நீங்கும்.

'ஓ' இரத்த பிரிவு
இவர்கள் மாமிச உணவுகளை சாப்பிடலாம். ஆனால் அதைவிட அதிக நார்ச்சத்து நிறைந்த காய்கறிகளை சாப்பிடலாம், இயற்கையாக இவர்களின் வயிற்றில் சீரணத்திற்கு சுரக்கும் அமிலத்தின் அளவு அதிகமாக இருப்பதுண்டு. அதனால் செரிக்க சற்று கடினமான உணவுகளை எடுத்துக் கொண்டாலும் எளிதில் சீரணமாகி விடும். கோதுமை இவர்களுக்கு பொருந்தாது. காரணம், கோதுமையில் இருக்கும் ஒரு வகை ரசாயனம் இவர்களது உடலுக்கு பொருந்துவதில்லை. பால் பொருட்களும் பொருந்துவதில்லை. பீன்ஸ்,பயறு வகைகளும் இவர்களுக்கு எதிராக இருக்கின்றன. இவற்றை அதிகம் சாப்பிடும் நிலையில் மந்தமான குணம் காணப்படுவதுண்டு. அது போல் முட்டைகோஸ்,காலிபிளவர்,கடல் உயிரினங்கள்,அயோடின் சேர்நத உப்பு போன்றவற்றையும் தவிர்ப்பது நல்லது.

இந்த விடயங்கள் ஒரு வேதியியல் மற்றும் சித்த மருத்துவம் தெரிந்த நண்பரின் ஆலோசனையில் பதியப்பட்டது. இங்கு குறிப்பிட்ட உணவுப்பொருட்கள் உங்களுக்கு ஒத்து வராத ஒன்றாக நீங்கள் அறிந்தால் இங்கு குறிப்பிடப்படும் தகவலும் பொருந்துவதாகும். மற்ற படி இந்த தகவல் பொதுவானது என்பதை உங்கள் கவனத்திற்கு வைக்கிறேன். நன்றி.

வீட்டிலேயே தினமும் அருவிக்குளியலின் ஆனந்தம் வேண்டுமா? இதைப்படிங்க!

0 கருத்துகள்


 'ஆடாதோடைக்கும் ஐந்து மிளகுக்கும் பாடாத நாவும் பாடும்' என்று ஆடாதோடையின் அருமைக்கும்,
'சுக்குக்கு மிஞ்சிய மருந்தில்லை, சுப்பிரமணியனுக்கு மிஞ்சிய தெய்வமுமில்லை'
என்று சுக்கையும் குறிப்பார்கள். இப்படி மூலிகைகளுக்கு அளப்பரிய மருத்துவ குணங்கள் உண்டு.

கருவேல மரத்தையும், வேம்பு மரத்தையும் கேலி செய்த கோல்கேட் இன்றைக்கு ' மூலிகை கலந்த பேஸ்ட்' கொண்டு பல்துலக்க சொல்லி விளம்பரத்தில் விளம்புகிறார்கள். இப்படி மூலிகைகளின் அருமையும்,பெருமையும் வெளிவந்து கொண்டிருக்கிறது. 'வேர்பார், தழைபார்,மெல்லமெல்ல செந்தூரம், பற்பம் பார்' என்கிறது தமிழ் பழமொழி.

ஆக. எங்கும் மூலிகைகளுக்கு ஒரு வரவேற்பு அதிகரித்துக் கொண்டே போகிறது. இந்த காலத்தில் புதிய மூலிகை பொடி ஒன்று மகளிர் சுய உதவிக்குழுவால் தயாரிக்கப்பட்டு விற்பனைக்கு விடப்பட்டுள்ளது. இது பற்றிய ஒரு பதிவு உங்கள் பார்வைக்கு.....

மனிதனின் கால்படாத மலைக்காடுகளில் ஏராளமான அரிய மூலிகைகள் வளர்ந்து கிடக்கின்றன. மழை பெய்யும் போது மழைநீர் இந்த அரிய மூலிகைகளின் வேர்களின் ஊடே பாய்ந்து வரும. இப்படி பாய்ந்து வரும் அருவி நீருக்கு ஏராளமான நோய்களை தீர்க்கும் குணம் உண்டு என்பது இயற்கை. அருவி நீரின் இந்த குணத்தை அறிந்து தான், ஆண்டுக்கு 3 மாதங்கள் வரை தண்ணீரை கொட்டும் குற்றாலத்திற்கு தமிழகத்தின் பல்வேறு மாவட்டங்களில் இருந்தும் மக்கள் வந்து குளித்து விட்டு போகிறார்கள்.

இப்படி குற்றாலத்தில் குளிக்கும் போது இருக்கும் புத்துணர்ச்சிய நமது வீட்டிலேயே அனுபவிக்க முடியுமா? முடியும் என்கிறது மதுரையை சேர்ந்த வானவில் பெண்கள் சுயஉதவிக்குழு. இவர்கள் 21 அரிய மலை மூலிகைகளை கொண்டு தரமுள்ள ஒரு குளியல் பொடியை தயாரித்திருக்கிறார்கள்.
பொதுவாக பெண்கள் முகத்தின் தோலின் நுண்ணிய துவாரஙகளில் இருக்கும் அழுக்கை நீக்க பாசிப்பயறு மாவை அரைத்து அல்லது கடையில் விற்கப்படும் பாசிப்பயறு பொடி மற்றும் ஸ்நானப்பொடியை வாங்கி வருவார்கள். இந்த பொடியை குழைத்து சற்று நேரம் முகத்தில் பூசி விட்டு கழுவி விடுவார்கள். இது இயற்கை. ஆனால் இந்த பாசி பயறு பொடி முகத்திற்கு மட்டும் தானே பயன்படுகிறது. உடலின் மற்ற பாகங்களுக்கும் புத்துணர்ச்சி வேண்டுமே!

ஆக...ஒட்டு மொத்த உடல் தோலிலும் ஊடுருவி அழுக்கை நீக்கி உடலுக்கு புத்துணர்வை ஊட்டும் ஒரு குளியல் பொடி வேண்டும் என்ற சிறிய ஐடியாவில் உருவானது தான் இந்த மூலிகை குளியல் பொடி. இந்த மூலிகை பொடியின் சிறப்பம்சம் என்னவென்றால், இந்த பொடியானது முழுமையாக மூலிகைகளின் கலவை தான். வாசணைக்கு கூட பாசிப்பயறு போன்ற பொடிகள் கலக்கப்படவில்லை.

மலைவாழ் மக்களின் உதவியுடன் மூலிகைகளை சேகரித்து வந்து அந்த மூலிகைகளை சூரிய வெப்பம் படாமல் நிழலில் உலர்த்தி காய வைத்து விடுகிறார்கள். பின்னர் அவற்றில் உள்ள தேவையில்லாத இலை,தழைகளை நீக்கி விட்டு இடித்து சலித்து மாவாக ஆக்கி விடுகிறார்கள்.
இந்த பொடியில் பிரதானமாக கஸ்தூரி மஞ்சள்,சந்தனம், மகிழம் பூ,வெட்டிவேர்,விளாமிச்சம் வேர், பச்சிலை,திரவியம் பட்டை உள்பட 21 மூலிகைகள் அடங்கியிருக்கிறது.

 இந்த மூலிகை பொடியில் குளித்து விட்டு போனால் உடலில் துர்நாற்றம் வீசாது. தோல்வியாதிகளை தடுத்து விடும். உடல் தோல் நல்ல ஆரோக்கியத்துடன் இருக்கும் என்கிறார்கள். இந்த பொடியை தமிழகம் முழுவதும் விற்பனை செய்ய முகவர்களையும் நியமிக்க உள்ளனர். எதிர்காலத்தில் மூலிகை குளியல் சோப், பல்பொடி இத்யாதிகளையும் விற்பனைக்கு விட உள்ளனர். இந்த தயாரிப்புகளை சந்தைப்படுத்த நீங்கள் தயாரா?

சுழற்றுங்கள் உங்கள் தொலைபேசியை......99 44 33 67 40 (திருமதி.கலைவாணி, வானவில் பெண்கள் மற்றும் குழந்தைகள் மேம்பாட்டு அறக்கட்டளை, மதுரை),

வாழ்க்கை போராட்டத்தில் முரட்டு தோற்றத்தை ஏற்படுத்திக் கொண்ட ஒரு அப்பாவி

0 கருத்துகள்



ந்த பூமியில் இருக்கும் விலங்கினங்களை இந்த வலைப்பதிவில் தொகுப்பதன் முதல் கட்டமாக ஊர்வனவற்றில் 'பாம்புகள்' பற்றிய தொகுப்புகளை பதிவிட்டிருந்தேன். அந்த பதிவு தொடரும் அதே வேளையில் சுவாரசியமான முதலைகளை பற்றி ஒரு அறிமுகத்தை இங்கு தருகிறேன். இதை மூன்று பதிவுகளாக எழுதுகிறேன்.
முதலில் முதலையை பற்றிய அறிமுகத்தையும், அதில் எத்தனை வகைகள் எந்தந்த இடங்களில் வசிக்கின்றன என்பது பற்றி பார்க்கலாம். தொடர்ந்து அவற்றின் குணம், இயல்பு, தமிழ்நாட்டிலும், இந்தியாவிலும் எந்த ஆறுகளில் இவை இருக்கின்றன என்றெல்லாம் பார்க்கலாம்.

அறிமுகம்
சாதிகள்,மதங்கள்,இனங்கள்,வித்தியாசங்கள்,போட்டிகள்,பொறமைகள்,உலகத்தில் காண்பவற்றையெல்லாம் தனதாக்கி கொள்ள வேண்டும் ஆசைகள்....இப்படி ஆறறிவு கொண்ட மனிதனின் அடங்காத ஆசைக்கு எதையும் தங்களுக்காக சேர்த்து வைத்துக்கொள்ள தெரியாத பறவைகளும், பாலூட்டிகளும், ஊர்வனவும் தங்கள் உயிரை இழந்து வருகின்றன. இதில் முதலையும் ஒன்று.

இன்றைக்கு சுமார் 2.5 கோடி ஆண்டுகளுக்கு முற்பட்ட காலத்தை ஊர்வன இனத்தின் பொற்காலமாக விலங்கியல் ஆராய்ச்சியாளர்கள் கருதுகிறார்கள். அதாவது மொசயிக் ஊழிக்காலம் என்று அழைக்கப்படும் இந்த காலத்தில் தான் டைனோசர் போன்ற நடக்கும் ராட்சத பல்லிகளும், பறக்க தெரிந்த டைனோசர் போன்ற தோற்றத்தில் சிறிது மாறுபட்ட டிரோசர் என்ற ஊர்வன இன விலங்குகளும் இந்த பூமியில் பெருமளவில் வாழ்ந்திருக்கின்றன. இந்த கூட்டத்தின் ஒரு பகுதியாக தான் இன்றைக்கு மீதமிருக்கும் முதலைகளும் வாழ்ந்து கொண்டிருந்திருக்கின்றன. ஆனால் இந்த விலங்குளின் வாழ்வு என்பது பூமியின் மீது ஒரு பெரிய விண்கல் மோதிய போது முடிவுக்கு வந்தது.

சுமார் 650 லட்சம் ஆண்டுகளுக்கு முன்பு பூமியை கடந்த செல்லும் வழியில் ஒரு விண்கல் பாதை மாறி பூமி உருண்டையில் மோதியது. அப்போது குலுங்கிய பூமி தீப்பிடித்து எரிந்தது. அதில் இந்த டைனோசர் உள்ளிட்ட ராட்சத பல்லிக்கூட்டமும் சேர்ந்து எரிந்து போனது. இந்த தீவிபத்தில் லட்சக்கணக்கான இந்த ராட்சத உயிர்களின் மூச்சும் அடங்கி போயின.

ஆனால் உருவத்தில் சிறிதாக இருந்ததால் என்னவோ, முதலைகள் மட்டும் தப்பித்து போயின. அதற்கு பிறகு வந்த இயற்கையின் மாற்றங்களில் சிறிதே பரிணாம வளர்ச்சியில் மாற்றம் பெற்று தற்போது நம்மிடையே பிழைப்பை நடத்திக் கொண்டிருக்கின்றன. உலகின் 5 கண்டங்களில் ஐரோப்பா கண்டம் தவிர, மற்ற நான்கு கண்டங்களிலும் முதலைகள் காணப்படுகின்றன. அதாவது உயிர்களின் பிறப்பிடமான நிலநடுக்கோட்டுக்கு தெற்கே தான் இவை வியாபித்துக் கொண்டிருக்கின்றன.

இப்படி பூமிக்கு ஏற்பட்ட பேரழிவிலிருந்து தப்பியதால் என்னவோ, முதலைகளின் தோற்றம் எதையும் தாங்கும் அமைப்பாக உள்ளது. கடினமான, கரடுமுரடான தோலுடன் எதையும் விழுங்கி செரிக்கும் ஆற்றல்,நீரிலும்,நிலத்திலும் வாழும் திறன்,எளிமையான பறவைகளை போன்ற முட்டையிட்டு குட்டிகளை பொறிக்கும் திறன் என்று மற்ற எந்த உயிரினத்திற்கும் இல்லாத ஒரு உடல் அமைப்பை பெற்றிருக்கிறது. இங்கு ஒரு விடயத்தை பார்க்க வேண்டும்.

அதாவது சாதாரணமாக பறந்து திரிந்து சிறிதளவு இரை தேடும் பறவைகளுக்கு தான் முட்டையிட்டு குஞ்சு பொரிக்கும் இயல்பு இருக்கும். ஆனால் ராட்சத உடல் அமைப்பு கொண்ட முதலைக்கு இப்படி ஒரு திறன் எதற்காக வந்திருக்க வேண்டும். பெரும்பாலும் தனக்கு வேண்டிய உணவை அது நீரில் மறைந்திருந்து தான் திடீரென்று கவ்வி பிடிக்கிறது.

இந்த முதலை மற்ற ராட்சத பாலூட்டிகள் போல் குட்டிகளை வயிற்றில் சுமந்து இருக்குமானால் இப்படி நீரில் மறைந்திருந்து மற்ற விலங்குகளை வாயால் கவ்வி சுழற்றி மரணத்தை அவைகளுக்கு பரிசாக அளித்து தனது இரையாக மாற்றிக் கொள்ள முடியாது போயிருக்கலாம். ஆக வாழ்க்கை போராட்டத்தில் தனது பரிணாமத்தை தக்க வைக்க, இப்படி முட்டையிட்டு குட்டிகளை பிறக்க வைத்து தனது இனத்தை தக்க வைத்திருக்கலாம் என்கிறார்கள் விலங்கியல் ஆய்வாளர்கள்.
இனங்கள்
உலகின் பல பகுதிகளில் இருக்கும் முதலைகளையும் இனம் கண்டதில் இதுவரை 22 வகையான முதலை வகைகள் கண்டறிய்பட்டதாக வரிசைப்படுத்தப்பட்டுள்ளன.
 1.கருப்புக்கைமன்
இது ஒரு நன்னீர் முதலை. இவை தென்அமெரிக்காவில் ஓடும் அமேசான் ஆற்றுப்பகுதிகளில் வாழ்கின்றன.
2.சைனீஸ் அலிகேட்டர்
சீனாவில் காணப்படுகின்றன நன்னீர் முதலை.
3.அமெரிக்கன் அலிகேட்டர்
ஐக்கிய அமெரிக்க நாடுகளின் தெற்குப்பகுதி சதுப்பு நிலங்களிலும்,கடற்கரைகளிலும் வாழக்கூடியது.
4.குவியாஸ் குட்டைக்காமன்
இவையும் அமேசான் நதியில் காணப்படுகின்றன.
5.ஸனீடாஸ் குட்டைக்காமன்
இது பிரேசில்,ஒரினாகோ,சுரினாம் ஆகிய நாடுகளின் சிறிய ஆறுகளில் காணப்படுகின்றன.
6.தட்டை மூக்கு கைமன்
இந்த முதலை பிரேசில் நாட்டில் மட்டுமே இருக்கின்றன.
7.கைமன்
இந்த நன்னீர் முதலை தென்அமெரிக்காவில் காணப்படுகிறது.
8.கியூபன் கைமன்
இதுவும் நன்னீர் முதலை தான்.இது கியூபா நாட்டில் மட்டுமே காணப்படுகிறது.
9.மோர்லெட் முதலை
மெக்சிகோ நாட்டு ஆறு ஏரிகளில் வசிக்கும் இந்த வகை முதலை சில சூழல்களில் ஆறுகளில் முகத்துவாரங்களில் உவர் நீரில் வாழ்கின்றன.
10.அமெரிக்கன் முதலை
பரந்த வடக்கு அமெரிக்க கண்டத்தில் நன்னீரிலும், உவர்நீரிலும் பரவலாக காணப்படுகின்றன.
11.ஆப்பிரிக்க நீள்மூக்கு முதலை
ஆப்பிரிக்காவில் வெப்ப மண்டலக்காடுகளில் வாழும் முதலை இது.
12.நைல் முதலை
மேற்கு ஆப்பிரிக்காவின் நதிகளில் வாழும் இது பரவலாக காணப்படுகிறது.
13.ஒரினகோ முதலை
இந்த முதலை தெற்கு ஆப்பிரிக்கா மற்றும் மடகாஸ்கர் தீவில் பொதுவாக காணப்படுகிறது.
14.இந்தோ பசிபிக் முதலை
இவை நன்னீரிலும்,கடல்நீரிலும் வாழக்கூடியவை, இருப்பினும் இந்தியா, இலங்கை, இந்தோனேசியா, ஆஸ்திரேலியா, நியூகினியா ஆகிய நாடுகளில் முகத்துவாரங்களில் இருக்கின்றன.
15. ஜான்ஸ்டன்ஸ் முதலை
இதுவும் நன்னீர் முதலை. இது வடக்கு மேற்கு ஆஸ்திரேலியாவில் வசிக்கின்றன.
16. சதுப்பு நில முதலை
இந்திய உபகண்டத்தில் இந்த முதலை தான் பரவலாக வாழ்கின்றன. இது தமிழில் முதலை என்றும் இந்தியில் மகர் என்றும் அழைக்கப்படுகிறது.
17.சையாமீஸ் முதலை
தாய்லாந்து, லாவோஸ்,கம்போடியா, வியட்நாம் மற்றும் மலாய் நாடுகளின் சதுப்பு காடுகள், ஆறுகள், ஏரிகளில் இது காணப்படுகிறது.
18. பிலிப்பைன் முதலை
இது பிலிப்பைன்ஸ் தீவுகளான மின்டோவா, குலூ, மாஸ்பேட் மற்றும் இவற்றை சுற்றியுள்ள நாடுகளின் ஆற்றுப்படுகைகள், சதுப்பு நிலங்களில் வாழ்கிறது.
19.குட்டை முதலை
ஓடும் நீரோடைகளில் வசிக்கக்கூடியவை. மேற்கு மற்றும் மத்திய ஆப்பிரிக்க நாடுகள் தான் இதன் இருப்பிடம்
20.சிறுகடியால் முதலை
இந்த முதலை போர்னியா, சுமத்ரா, ஜாவா,மலேயா நாடுகளில் வாழும் நீள்மூக்கு கொண்ட சிறு முதலை.
21.கடியால் முதலை.
நீண்ட முக அமைப்பு உடைய இந்த முதலைகள் வடஇந்தியா, பாகிஸ்தான்,நேபாளம்,பங்களாதேசம்,மியான்மர்,பூடான் ஆகிய நாடுகளில் காட்டுநதிகளில் காணப்படுகின்றன.உலகிலேயே இதற்கு தான் நீளமான மூக்கு காணப்படுகிறது.
22. நியூகினியா முதலை
இது சதுப்பு நிலம் மற்றும் ஆறு, ஏரிகளில் வாழ்கிறது. நியூகினியா நாட்டில் காணப்படுகிறது.
 இந்த 22 இனங்களில் ஓரிரு இனங்கள் தவிர மற்ற முதலைகள் எல்லாம் அழியும் அபாய கட்டத்தில் இருக்கின்றன. இவைகளின் எதிரிகள் யார்? மனிதர்களை தவிர வேறு யார் இருக்கமுடியும். பூமிப்பந்தில் விண்கல் மோதல் நடந்த போது டையனோசர்கள் எல்லாம் கூட அழிந்து முதலை தப்பித்தது. ஆனால் இன்றைக்கு மனிதர்களிடம் மாட்டிக் கொண்டு தவிக்கிறது. கண்மூடித்தனமான வேட்டையில் இவற்றின் வாழ்விடங்கள் கடுமையாக பாதிக்கப்பட்டுள்ளன.

அடுத்த பதிவில் முதலையின் உடல் அமைப்பையும், சிங்கம், காட்டெருமை போன்ற பலமான மிருகங்களை கூட முதலைகளால் எப்படி கொல்ல முடிகிறது என்பது பற்றி பார்க்கலாம்.

(தொடரும்)
முதலைகள் வகைகள் பற்றி ஆங்கிலத்தில் சிறப்பாக தொகுக்கப்பட்டு ஒரு இணைய தளம்..படம் அருமை. சென்று பாருங்கள் http://www.flmnh.ufl.edu/cnhc/csl.html

உங்கள் வீட்டு குடிதண்ணீரின் தரம் என்ன என்பது பற்றி தெரிந்து வைத்திருக்கிறீர்களா?

0 கருத்துகள்



முன்பெல்லாம் வீடுகள் என்றால் அங்கு ஒரு கிணறு இருக்கும். கிணற்றில் கயிறில் கட்டப்பட்ட வாளியில் தண்ணீரை இழுத்து இறைத்து குளிப்பது அலாதி சுகம். ஒரு கட்டத்தில் கிணறுகள் குறைந்து அடிபம்புகள் வந்தன. அதற்கடுத்து ஜெட்மோட்டார்கள், சப்மர்சிபிள் என்று பூமியின் ஆழத்தில் கிடக்கும் மோட்டார் கொண்ட ஆழ்துளை குழாய் என்று படிப்படியாக உருமாறின. இந்த மோட்டார்களில் எல்லாம் இல்லாத ஒரு சிறப்பம்சம் கிணற்றுக்கு உண்டு. அது, கிணற்றில் ஊறும் தண்ணீர் கண்ணாடி போல் நமது பார்வையில் தெளிவாக இருக்கும். உச்சி வேளையில் கிணற்று தண்ணீரில் சூரியனின் ஒளி பிரதிபலித்து சில நேரங்களில் கிணற்றின் அடி ஆழம் வரை தெரியும். இது ரம்மியமான காட்சியாக இருக்கும்.

இப்போது இப்படி இருந்த கிணறுகள் எல்லாம் பெரும்பாலும் மறைந்து விட்டன. கிராமப்புறங்களில் விவசாயத்திற்காக மட்டும் தான் தற்போது கிணறுகள் பயன்பாட்டில் உள்ளன. கிணறுகள் திறந்த நிலையில் இருந்ததால், தண்ணீரில் ஏற்படும் மாற்றத்தை சுலபமாக தெரிந்து கொள்ள முடியும். உதாரணமாக, செழிப்பாக மழை பெய்திருந்தால் கிணற்றில் ஊறும் தண்ணீரானது எங்கள் வீட்டில் இருந்த கிணற்றில் செம்மண் நிறத்தில் இருப்பது வழக்கம்.

ஆனால் தற்போது உள்ள போர்வெல் குழாய்கள் நீரை இழுத்து நேரடியாக தொட்டியில் நிரப்புவதால் மாடிக்கு சென்று தொட்டியில் ஏறிபார்த்தால் மட்டுமே நீரின் தெளிவு, சுத்தம்,நிறம் போன்றவற்றை காண முடியும். எனவே, நம்மால் பல நேரங்களில் தண்ணீரின் இயல்பை தெரிந்து கொள்ள முடியாமல் அன்றாடம் பயன்படுத்திக் கொண்டு தான் இருக்கிறோம்.
ஆனால் தண்ணீரை பற்றி நாம் மிகவும் அவசியமாக தெரிந்து கொள்ள வேண்டிய சில விடயங்கள் இருக்கின்றன. அதை கேள்வி பதில் வடிவத்தில் தொகுத்துள்ளேன். தமிழக அரசின் நிலநீர்பிரிவு வெளியிட்டுள்ள இந்த தொகுப்பு சொல்லும் தகவல்கள் இதோ....
 1.சமீபகாலமாக பல் காவி நிறமாகிறது. ஏன்?
நீங்கள் குடிக்கும் நீரில் புளோரைடு என்ற உப்பு அதிகமாக இருக்கலாம். இந்த புளோரைடு உப்பு பற்களை மஞ்சள் நிறமாக மாற்றும். குடிக்கும் நீரில் ஒரு லிட்டரில் 1.5 மி.கிராம் அளவிற்கு அதிகமாக புளோரைடு இருக்க கூடாது. இந்த அளவிற்கு மேல் புளோரைடு அதிகம் இருக்கும் நீரை கண்டிப்பாக குடிக்க பயன்படுத்த கூடாது.

2. புளோரைடு அளவுகோல் பற்றியும், அதன் விளைவுகள் பற்றியும் கூறவும்?
குறைந்த புளோரைடு அளவு என்பது (0.5-1.0 மிகிராம் லிட்டர்) இந்த அளவு இருந்தால் அது பற்களுக்கு பாதுகாப்பானது. இந்த அளவு புளோரைடு இருந்தால் அது பல் சொத்தை விழாமலும், பல்லில் துர்நாற்றத்தையும் தடுத்து விடுகிறது. ஆனால் 1.5 என்ற அளவை விட குடிநீரில் புளோரைடு அதிகம் இருந்தால் அந்த நீரை குடிப்பவர்களுக்கு பல் காவி நிறமாகும். உடலின் எலும்புகள் எல்லாம் பாதிக்கப்பட்டு முடக்குவாதம் என்ற நோய் உருவாகி செயலற்ற நிலைக்கு தள்ளப்படுவார்கள். புளோரசிஸ் என்ற நோய் ஏற்படும்.

3. பிறந்து ஆறு மாதம் ஆன சில குழந்தைகள் நீலமேறுதல் மற்றும் திடீரென்று இறந்து போவதின் காரணம் என்ன?
குடிக்கும் நீரில் அதிகமான நைட்ரேட்டு என்ற ரசாயன உப்பு இருந்தால் குழந்தைகள் திடீரென்று உடலில் நீலநிறம் பாய்ந்து இறந்து போவதுண்டு.

4. வீட்டின் மேல்நிலை தொட்டிகளில் அடிக்கடி பாசி படிகிறது. இது ஏன்?
காற்று,சூரிய ஒளி ஆகியவை தொடர்ந்து படும் மேல்நிலை தொட்டிகளில் இது போல் பாசி ஏற்படும். எனவே காற்று, சூரிய ஒளி படாமல் தண்ணீர் தொட்டிகளை நன்றாக மூடி வைத்திருக்க வேண்டும். கிணறுகளையும், நீர்தொட்டிகளிலும் சிறிதளவு பிளீச்சிங் பவுடர் கலக்கலாம். அதாவது 100 லிட்டர்தண்ணீருக்கு 30 விழுக்காடு திறன் உள்ள பிளீச்சிங் பவுடர் 1 கிராம் என்ற அளவில் சேர்க்கலாம்.

5. சில நேரங்களில் சமைக்கும் போது சோறு மஞ்சள் நிறமாக ஆகிவிடுகிறதே ஏன்?
நீரின் காரத்தன்மை (alkalinity) அதிகமாக இருந்தால் சோறு வேக வைத்த பின்பு மஞ்சள் நிறமாக இருக்கும். பருப்பும் சரிவர வேகாது.

6.நீரினை பிடித்து சேகரித்து வைக்கும் போது, மஞ்சள் நிறமாக இருக்கிறது. இந்த தண்ணீரில் துணிகளை துவைக்கும் போது காவி,பழுப்பு கறை ஏற்படுகிறது. எதனால்?
இது இரும்பு(iron) உப்பு இருப்பதால் நிகழ்கிறது. இரும்பு அகற்றும் சுத்திகரிப்பு முறைகளை பயன்படுத்தலாம். எளிமையான வடிவமைப்பு கொண்ட சுத்திகரிப்பு நீர் தொட்டிகளை பயன்படுத்தி இரும்பு சத்தை குறைக்கலாம்.
7. போர்வெல் தண்ணீரின் உப்புத்தன்மையை நீக்க தொட்டியில் தேத்தங் கொட்டை அல்லது நெல்லி மரக்கட்டையை போட்டு வைக்கலாமா?
தேத்தங்கொட்டை அல்லது நெல்லி மரக்கட்டை துவர்ப்பு சுவையுடையது. துவர்ப்பும், உப்பும் இருக்கும் போது நீரானது, உப்பு குறைந்துள்ளதாக தோன்றும். ஆனாலும் நீரில் குறைந்துள்ள ரசாயனங்களின் அளவில் மாற்றம் ஏற்படுவதில்லை.

8. கழிவறை தொட்டி (செப்டிக் டேங்க்) மற்றும் ஆழ்குழாய் கிணறு(போர்வெல்) இவற்றுக்கு இடையே இருக்க வேண்டிய இடைவெளி எவ்வளவு?
சுமார் 50 அடி இடைவெளி இருக்க வேண்டும்.

நீர்வழி நோய்களிலிருந்து தற்காத்துக் கொள்ள சில வழிமுறைகள்
  • நீரை கொதிக்க வைத்து, குளிர வைத்து, வடிகட்டி பின்னர் குடிப்பதற்கு பயன்படுத்தலாம்.
  • நோய் கிருமிகளை அழிக்க பிளீச்சிங் பவுடர் பயன்படுத்தலாம் (1000 லிட்டருக்கு 1 கிராம் என்ற அளவில்)
  • தொழிற்சாலை கழிவுகள், வீட்டு உபயோக கழிவுகள்(குப்பைகள்), கால்நடை கழிவுகள், நீர்நிலை ஆதாரங்களில் கலக்காமல் பாதுகாப்பான தூரத்தில் போர்வெல் அமைந்திருக்க வேண்டும்.
  • கைப்பம்புகள், குழாய்களை சுற்றி கழிவு நீர் தேங்காமல் பார்த்துக் கொள்ள வேண்டும். குழாய், போர்வெல்லின் அடியில் குளித்தல், மாடுகளை கழுவுதல், துணிதுவைத்தல் போன்றவற்றை தவிர்க்க வேண்டும்.
  • புளோரைடு நீரில் இருக்கும் அளவை கண்டிப்பாக தெரிந்து கொள்ள நீரை பரிசோதனை செய்து பிறகு பயன்படுத்த வேண்டும்.

நீங்கள் சென்னைவாசி என்றால் கீழே உள்ள விலாசத்தில் உங்கள் போர்வெல் தண்ணீரை கொடுத்து அந்த தண்ணீரில் என்ன வகையான உப்புகள் எல்லாம் கலந்திருக்கின்றன. அது குடிக்க உகந்ததா என்பது பற்றி தெரிந்து கொள்ளலாம். இது தவிர தமிழக்கத்தின் ஒவ்வொரு மாவட்டத்திலும் நீர் பரிசோதனை கூடங்களை அரசு அமைத்துள்ளது. அங்கே சென்று நீரின் தரத்தை பரிசோதித்து கொள்ளலாம்.

உதவி இயக்குநர், (நில வேதியியல்)
நிலவேதியியல் உட்கோட்டம்,
தரமணி,பொதுப்பணித்துறை வளாகம்,
தரமணி, சென்னை-600113
போன்:044-22541373
தண்ணீரை சிக்கனமாக பயன்படுத்த 100 வழிகளை சொல்கிறது இந்த தளம். படித்து பாருங்களேன்!  http://wateruseitwisely.com/100-ways-to-conserve/index.php

மனிதர்களின் பேராசைக்கு இரையாகும் இருதலை மடையர்கள்!!!

0 கருத்துகள்



'பாம்பை கண்டால் படையும் நடுங்கும் என்பார்கள்'. ஆனால் தற்போது மனித படையைக் கண்டு ஒரு பாம்பு ஓடுகிறது. மனிதனின் பேராசைக்கு இந்த பாம்பு ஏராளமாக இரையாக தொடங்கியிருக்கிறது. அது, இருதலை மடையன் அல்லது இருதலையன் மணியன் என்றும் அழைக்கப்படும் மண்ணுளி பாம்பு.

இந்த பாம்பில் இருந்து ஆஸ்துமா, எலும்புருக்கி நோய்,எயிட்ஸ் நோய் போன்ற நோய்களுக்கு மருந்து தயாரிக்கப்படுவதாகவும், இந்த பாம்புகளை பிடித்து விற்றால் 5 லட்சம் முதல் 10 லட்சம் வரை தரப்படுவதாகவும் புரளி கிளம்பியது. இதனை நம்பிய அப்பாவிகள் சிலர் தமிழகத்தின் கிராமங்களில் அப்பாவியாக ஆங்காங்கே திரியும் மண்ணுளி பாம்புகளை பிடிக்க படையெடுத்தார்கள். அழியும் நிலையில் உள்ள இந்த பாம்புகளை பிடிப்பது குற்றம் என்பதால் இந்த மண்ணுளி பாம்புகளை பிடித்தவர்களை போலீசார் பிடித்து சிறையிலடைத்தார்கள்.

 இவர்களிடமிருந்து இதுவரை ஆயிரத்திற்கும் மேற்பட்ட மண்ணுளி பாம்புகள் பறிமுதல் செய்யப்பட்டுள்ளன. எதையாவது பிடித்து, எதையாவது விற்று குறுகிய காலத்தில் பணக்காரர்களாக ஆகி விட வேண்டும் என்பது தான் இவர்களின் நோக்கம். மிகப்பெரிய இலக்கியங்களையும், இலக்கணங்களையும் படைத்த, கல் தோன்றி மண் தோன்றா காலத்து முன் தோன்றி மூத்த தமிழ்க்குடிகளின் நிலைமை பரிதாபமாக இருக்கிறது.

இது ஒரு பக்கம் இருக்கட்டும். இந்த பதிவின் நோக்கம் என்பது பாம்புகளை பற்றிய ஒரு அறிமுகத்திற்காக.முதலில் இங்கு பாம்புகளை பற்றிய பொதுவான செய்திகளையும், இந்திய நாட்டில் காணப்படும் நச்சுள்ள, நச்சற்ற பாம்புகளையும் பற்றி பாம்பு என்ற லேபிளின் கீழ் பதிவிடுகிறேன். 

பாம்புகள்  மனிதர்களின் நண்பர்கள். காரணம், பாம்புகள் இல்லையென்றால் மனிதன் கடினமாக உழைத்து விதைத்து அறுவடை செய்யும் நெல்மணிகளை பெருச்சாளிகள் கொண்டு சென்று விடும். இந்த பெருச்சாளிகளை தேடிப்பிடித்து கொல்லும் ஒரே ஊர்வன என்றால், அது பாம்பு தான். குறிப்பாக  மணியன் வகை பாம்புகள் எலியையும், எலிக்குட்டிகளையும் பெருகவிடாமல் தின்று தீர்த்து விவசாயிகளுக்கு பெரும் அளவு உதவியாக இருக்கின்றன.
பாம்புகள் -பொதுவான செய்தி
உலகில் சுமார் 2000 வகை பாம்புகள் இருக்கின்றன. இதில் 400 வகை பாம்புகள் இந்தியாவில் இருக்கின்றன. இவற்றில் சுமார் 20 வகையான பாம்புகள் தான் நச்சுப் பாம்புகள். அதிலும் இந்த வகை எல்லாவற்றுக்கும் மனிதனை கொல்லக்கூடிய அளவு நச்சு கிடையாது. இதிலும் 5 வகையான பாம்புகள் தான் கடித்தால் மரணத்தையோ அல்லது துன்பத்தையோ தரும் வலிவுடைய பாம்புகள் நச்சுப்பாம்புகள் வகைப்படுத்தப்பட்டுள்ளன.
அவை
INDIANCOBRA
1.நாகங்கள்  2.கட்டு விரியன்கள்  3.தட்டைவாற் கடற்பாம்புகள். 4.விரியன் பாம்புகள்   5. ஆப்ரிக்க காடுகளில் காணப்படும் ப்ளாக் மாம்பா (இந்த பாம்பு கடித்தால் மிகப்பெரிய மாடுகளும், யானைகளும் நொடியில் இறந்து விடும்)  6.ஆஸ்திரேலியாவில் காணப்படும் புலிப்பாம்பு ஆகியவை.
பாம்புகளை பற்றி ஆய்வு செய்யும் நிபுணர்கள், பாம்புகளின் குணத்தை பிரிக்க அந்த பாம்புகளின் உடலின் அடிப்பாகத்தில் அமைந்த அடையாளங்களையும், செதில்களின் எண்ணிக்கையும் வைத்து தான் பிரிக்கின்றனர்.

உதாரணமாக, நாம் அனைவரும் பயப்படும் நாகப்பாம்பு அல்லது நல்ல பாம்புக்கு உடலின் அடியில் இருக்கும் செதில்களின் எண்ணிக்கை 176 முதல் 200 வரை. இதன் 'படம்' (தலையில்) இரண்டு சக்கரம் கொண்டது. ஆனால் ஒரே சக்கரம் கொண்ட நல்ல பாம்பும் இருக்கிறது. இந்த சக்கரத்தை அடிப்படையாக வைத்து இதிலும் ஐந்து உட்பிரிவுகளை பிரித்துள்ளார்கள்.

'நாயா நாயா நாயா' என்றால் தென்னிந்தியாவில் காணப்படும் நல்லபாம்பு இனம். இவற்றுக்கு இரண்டு சக்கரம் உண்டு. 'நாயா நாயா கெளதியா' என்ற நல்ல பாம்பு இனத்திற்கு ஒரு சக்கரம் தான் உண்டு. இந்த இனத்திற்கு கழுத்தின் அடிப்புறம் பட்டையாக கருமை நிறம் இருக்கும். 'நாயா நாயா ஆக்சியானா' என்ற நல்லபாம்பு இனத்திற்கு அடிப்பாக செதில்கள் 183 முதல் 213 வரை இருக்கும். 'நாயா ஹண்ணா' என்ற இனத்தை சேர்ந்தது உலகின் அனைத்து பாம்பு ஆய்வாளர்களும் வியந்து பார்க்கும் 'ராஜநாகம்( king cobra)'. இதற்கு வேறு எந்த நாகத்திலும் காணப்படாத இரு பெரிய செதில்கள் உண்டு. அரச நாகமாகிய இரு 18 அடி வரை வளரும். அடர்நத மலைக்காடுகளில் தான் இது காணப்படுகிறது. உலகில் காணப்படும் நச்சுப்பாம்புகளிலலேயே இது தான் பெரியது. இந்த இராஜநாகம், மற்ற நாகப்பாம்புகளை விரும்பி வேட்டையாடுகிறது.

இருதலை மணியன்
நாம் இந்த முதல் பதிவில் குறிப்பிடும் இருதலைமணியனுக்கு நச்சு இல்லை. இந்த இருதலை மணியன் பாம்புகளை தமிழ்நாடு வயல்வெளிகள் எல்லாம் பார்க்க முடியும். இந்த பாம்புகளை காணும் விவசாயிகளும் அவற்றை எதுவும் செய்யாமல் விட்டுவிடுவதுண்டு. காரணம், இவை எலி பிடிப்பதால் தான்.

இந்த இருதலை மணியன் அல்லது மடையன் என்ற பெயர் எப்படி வந்தது?
இந்த பாம்பின் வால் மொட்டையாகவும்,சில பெரிய செதில்களுடனும் இருப்பதால் தலை போல் தோன்றும். இந்த மொட்டை பாகம் மேல் எழும்புவதும், பின்னோக்கி நெளிவதும் இதற்கு தலை போன்ற தோற்றத்தை தருவதாக இருக்கிறது.
மண்ணுளி பாம்பு என்ற இருதலை மணியன்
 இந்த பாம்பு எலிகளை பிடிக்க ஒரு தந்திரத்தை கையாளுவதாக சொல்கிறார்கள். அதாவது, தலை போல் உள்ள வால் பகுதியை எலி இருக்கும் வளையின் உள்ளே விட்டு அப்படியும், இப்படியுமாக ஆட்டுவதுண்டு. அப்போது தனது வளைக்குள் பாம்பு வந்து விட்டதாக தவறாக கருதும் எலி, வளையை விட்டு வெளியேற நினைத்து வளையின் மற்றொரு பொப்பான் வழியாக வெளியே குதிக்கும். பொப்பான் என்பது ஒரு பொய்த்துவாரம். இந்த வழியாக தான் ஆபத்து காலத்தில் எலி தப்பிப்பதுண்டு. இந்த பொப்பானுக்கு அருகில் தனது உண்மையான தலையை வைத்து காத்திருக்கும் இந்த இருதலை மணியன், தாவிவரும் எலியை அப்படியே விருந்தாக்கிக் கொள்ளும்.

 இந்த பாம்புகளை வீட்டில் வளர்த்தால் ராசி என்பதாலும் மேலே சொன்னவர்கள் பிடித்து சென்று விற்க முயற்சித்திருக்கிறார்கள். இந்த பாம்புகளை கூட்டில் வைத்து வளர்க்கும் போது மிக சாதுவாக நாய்க்குட்டி போல் இருக்கும். எலி,ஓணான்,அணில், சிறுபறவைகள் ஆகியவை தான் இவற்றின் உணவு. ஆகாரமின்றி நீண்ட நாட்களுக்கு பட்டினி கிடக்கும் தன்மையும் இந்த இருதலை மணியனுக்கு உண்டு. வளர்க்கப்பட்ட இருதலை மணியன்கள் 8 மாத கால அளவிற்கு கூட எதுவும் உண்ணாமல் இருந்ததாக சொல்கிறார்கள். மனிதன் கையில் எடுத்தாலும் இந்த பாம்புகள் எதுவும் செய்வதில்லை. கையில் எடுத்து பந்து போல் சுருட்டினாலும் அது தனக்கு எதுவும் நடப்பதாக காட்டிக் கொள்ளாது. அவ்வளவு பரமசாதுவானது. வீட்டில் ஒரு கூண்டு வைத்து அதில் மண்ணை போட்டு இந்த இருதலை மணியனை போட்டு வைத்தால் மண்ணுக்குள் பதுங்கிக் கொண்டு அப்படியே இருக்கும்.

இயற்கையிலேயே படு சோம்பேறியான இந்த பாம்பை தான் ராசியானது. எய்ட்சுக்கு மருந்து தயாரிக்க முக்கியமான மூலப்பொருள் என்றெல்லாம் கிளப்பிவிட்டு இப்போது கடத்திக் கொண்டிருக்கிறார்கள்.
இவர்களின் கடத்தலால் இப்போது எலிகளுக்கு தான் கொண்டாட்டம் ஆகியிருக்கிறது. காரணம், மணியன் இல்லாவிட்டால் மனிதர்கள் விளைவிக்கும் நெல்லை கடத்திக் கொண்டு போய் வளையில் சேமித்து வைத்துக் கொள்ள முடியுமே! ஆக..இருதலை மணியன்கள் இல்லாவிட்டால் விவசாயிகளின் பாடு திண்டாட்டம் தான்.

தட்டுவாழ் உழவன் அல்லது மலை உழவன்
சாய்வாக வெட்டுப்பட்டது போன்ற தோற்றமுடைய வாலுடைய இந்த சிறுபாம்பும் இருதலை மணியன் போன்றது தான். இவை தமிழ்நாட்டில் கொடைக்கானல், ஊட்டி, நீலகிரி, சிறுமலை, குடகு, கேரள மலைப்பிரதேசங்களில் காணப்படுகின்றன. இவற்றில் நஞ்சு இல்லை. தலைக்கூர்மையாகவும், சப்பலாகவும் இருப்பதால் திடீரென பார்க்கும் போது வாலும் தலையும் ஒன்று போலவே தோன்றும். சில பாம்புகள் பென்சில் அளவு தான் பருமனும், நீளமும் உள்ளவை. நம் நாட்டில் சுமார் 25 வகையான மலை உழவன் பாம்புகள் இருப்பதாக கணக்கிடப்பட்டுள்ளது.

இவை எல்லாம் அழகான நிறங்களில் காணப்படுகின்றன. குட்டையான இவற்றின் வாலில் தகடு போன்ற செதில்கள் காணப்படுகின்றன. மேற்தாடையில் 6 முதல் 8 சிறிய பற்கள் இருக்கின்றன. ஒரு தடவையில் 8 குட்டிகள் வரை போடுகின்றன. இவை யாவுமே கையில் எடுத்தால் கடிப்பதில்லை. புழுக்களையும், பூச்சிகளையும் இவை உட்கொள்கின்றன.

இந்திய ராணுவத்தில் பணியாற்றிய கேப்டன் சுரேஷ் என்பவர் பாம்புகளை பல்வேறு இடங்களில் புகைப்படம் எடுத்திருப்பதுடன், பாம்புகள் பற்றி பல தகவல்களையும் சொல்லியிருக்கிறார். அவரது இந்த தளத்தை பாம்பு பிரியர்கள் கண்டிப்பாக(http://captsuresh.com/tag/tips-on-dos-and-don%E2%80%99ts-of-wildlife-photography) பார்வையிடவும். பாம்பு பற்றிய கேள்விகளுக்கும் பதில் தருகிறார்.

குக்கரில் சமைத்த உணவு சர்க்கரை நோய்க்கு காரணமா? சாராய் குக்கரில் சமைத்து பாருங்களேன்!

2 கருத்துகள்




ன்னும் 20 ஆண்டுகளில் இந்தியா சர்க்கரை நோயாளிகளின் எண்ணிக்கையை அதிகம் கொண்ட நாடாக இருக்கும் என்று புள்ளி விவரங்கள் சொல்கின்றன. தங்கவேலு, சந்திரபாபு கால படங்களில் எல்லாம் சர்க்கரை நோய் என்றால் அது பணக்காரர்கள் நோய் என்பது போல சித்தரித்திருப்பார்கள். ஆனால் இப்போது இந்த நோய் அரசாங்க மந்திரிகள் முதல் சாதாரண ஆண்டி வரை பரவலாக காணப்படுகிறது. இரத்தத்தில் எந்த அளவு சர்க்கரை (குளுக்கோஸ்) சேர வேண்டும் என்று நிர்ணயிப்பது கணையம் என்ற உடலின் முக்கியமான உறுப்பு தான். இந்த உறுப்பில் ஏற்படும் கோளாறு அல்லது செயல்பாட்டுக் குறைவு தான் சர்க்கரை நோயை உண்டாக்குகிறது என்கிறார்கள்.


இந்த பாதிப்பு ஏற்படுவதற்கு குக்கர் போன்ற சமையல் சாதனங்களும் ஒரு காரணம் என்று செய்திகளில் அலசப்படுகின்றன. சாதாரண பாத்திரத்தில் சோற்றை வடித்து சாப்பிடும் பழக்கம் தான் சிறந்தது. சுவையும்,உணவின் சத்துக்களும் வீணாகமல் கிடைக்க திறந்த பாத்திரத்தில் சமைத்து சாப்பிடுவது தான் சிறப்பு என்பதிலும் உண்மை இருக்கிறது என்கிறார்கள். அதாவது திறந்த நிலையில் பிரபஞ்சத்தின் அனைத்து கண்ணுக்கு புலப்படாத சக்திகளும் அந்த உணவின் மீது தங்கள் ஆதிக்கத்தை செலுத்துகின்றன என்கிறார்கள். ஒரு வகையில் இது சரிதான் என்பது இயற்பியலை சற்று நிதானித்து அவதானித்து பார்த்தால் புரியும்.


 உதாரணமாக மிக்சியில் அரைத்த சட்னி விரைவில் கெட்டு விடுகிறது. சுவையும் அவ்வளவு சிறப்பாக இருப்பதில்லை. ஆனால் ஆட்டு உரலில் அல்லது அம்மிக்கல்லில் அரைத்த சட்னியின் சுவை அலாதியாக இருக்கும். அதாவது மிக்சியின் ஜாரினுள் தேங்காய், பொட்டுக்கடலை, மிளகாய், வெள்ளைப்பூண்டு, உப்பு எல்லாம் போட்டு மூடியை கொண்டு மூடி விட்டு அரைக்கிறோம். அப்போது அந்த மூடியினுள் இறுக்கி வைக்கப்பட்ட காற்றுடன் இந்த தேங்காள், கடலை எல்லாம் சில நொடிகளில் அரைபட்டு திப்பிதிப்பியாக வந்து விடுகின்றன. ஆனால் அம்மிக்கல்லில் அரைக்கும் போது இரண்டு ராட்சத கற்கள் (அம்மி மற்றும் அரைக்கும் கல்) இந்த உணவுப்பொருட்களை அரைக்கின்றன. திறந்த வெளியில் அரைப்பதால் அதன் மீது போதிய காற்று, பிராணவாயு, வெளிச்சம் மற்றும் திறந்த வெளியில் பிரபஞ்சத்தின் அத்தனை கதிர்களும் கண்ணுக்கு தெரியாமல் இழுக்கப்பட்டு அரைபடுகின்றன.


ஆக. நாம் எங்கிருந்து வந்தோமோ..அந்த பிரபஞ்சத்தின் சத்துக்கள் சட்னியில் கலந்து விடுகின்றன எனலாம். இந்த சட்னியின் சுவை அலாதியாக இருக்கும். மல்லிகை பூ போன்ற ஆவி பறக்கும் இட்லிக்கு, அம்மிக்கல்லில் அரைத்த சட்னியை விட்டு சாப்பிட்டால் எத்தனை இட்லி வயிற்றுக்குள் போகும் என்ற கணக்கே தெரியாது. இன்றைக்கும் சென்னை, மதுரை,கோவை,திருச்சி உள்பட சில இடங்களில் வீடுகளில் நடத்தப்படும் மெஸ்களில் இது போன்ற அம்மிக்கல் டெக்னிக் மூலம் தங்கள் வாடிக்கையாளர்களை தக்க வைத்துக் கொண்டு, நல்ல உணவை கொடுப்பதுடன் நல்ல வருமானம் பார்க்கும் குடும்பங்கள் அதிகம் உள்ளன.


 இது ஒரு பக்கம் இருக்கட்டும். நாம் இப்போது சாதாரணமாக பயன்படுத்தும் குக்கரில் வெப்பத்தின் அழுத்தத்தால் உணவுகள் சமைக்கப்படுகின்றன என்பது தெரிந்த விடயம். மாதம் தோறும் எரிவாயு சிலிண்டர் என்ற திரவ பெட்ரோலியம் வாயு உருளைக்கு 450 ரூபாய் வரை செலவிடுகிறோம். சில குடும்பங்களுக்கு இந்த ஒரு சிலிண்டரும் குறைவானதாகவே இருக்கிறது. இந்த வாயுவானது சுற்றுச்சூழலை வெப்பபடுத்துகிறது. இது தவிர, சமைக்கப்படும் உணவின் சுவையும் குறைவு தான். இது தவிர,குக்கர் உணவுகள் சர்க்கரை நோய் போன்றவற்றை ஏற்படுத்துவதற்கு ஒரு காரணமா என்ற கேள்விக்குறியுடன் இருக்கிறது. இது போன்ற கேள்விகள், பாதிப்புகளை எல்லாம் ஒதுக்கி வைத்து விட்டு குறைவான செலவில், சுற்றுச்சூழலுக்கு பாதிப்பில்லாமல், நோய்கள் எதுவும் தாக்குவதற்கு காரணமாகமல் இருககும் வகையில் ஒரு சமையல் பாத்திரத்தை உருவாக்க முடியுமா? என்ற எண்ணத்தில் உருவானது தான் சராய் குக்கர்.


இந்தியாவின் தொழில் நகரமான புனே நகரை சேர்ந்த சமுச்சி என்விரோ டெக் என்ற நிறுவனம் இந்த குக்கரை உருவாக்கியுள்ளது. கிராமப்புற மக்களின் எரிபொருள் தேவையை கருத்தில் கொண்டு தான் இந்த குக்கர் உருவாக்கப்பட்டது என்றாலும், இன்றைக்கு சமையல் எரிவாயு சிலிண்டர் உள்பட சுற்றுச்சூழலை கெடுக்கும் எரிபொருள்களின் விலை உயர்வதாலும், தட்டுப்பாடு இருப்பதாலும் இந்த சராய் குக்கரை அனைவரும் பயன்படுத்துவதன் மூலம் வழக்கமான எரிபொருளை குறைக்கலாம்.
இது பற்றிய ஒரு பார்வை


  • இந்த குக்கர் என்பது ஒரு பெரிய தூக்குவாளி போன்ற அமைப்பில் தான் உள்ளது. அதாவது மும்பை "டப்பா வாலாக்கள்' வைத்திருப்பது போன்ற அமைப்பில் இருக்கிறது. அடுப்பும், சமையல் பாத்திரமும் இணைந்த ஒரு அமைப்பாக இருக்குமாறு உருவாக்கப்பட்டிருக்கிறது.
  • ஸ்டெயின்லஸ் ஸ்டீல் உலோகத்தால் தயாரிக்கப்பட்டிருக்கிறது. இது வெப்பம் மற்றும் நீராவி கொண்டு சமையல் செய்யும் அடிப்படை முறையில் இயங்குகிறது. அதாவது மிதமான தீயில், குறைந்த வெப்பத்தில் உணவு தயாரிக்கப்படுவதால் உணவின் சுவை அபாரமாக இருக்கிறது.
  • நமது பிரஸடிஜ் குக்கரில் உள்ளது போல் வால்வ், கேஸ்கட், விசில் எதுவும் இல்லை. இதனால் அரிசிக்கு இத்தனை விசில், பருப்புக்கு இத்தனை விசில் என்று எண்ணிக் கொண்டிருக்க தேவையில்லை. சமையலை தொடங்கி விட்டால் 30 நிமிடம், 45 நிமிடம் என்ற கணக்கில் முடித்துவிடலாம்.
  • இதற்கு எரிபொருளாக நிலக்கரி பயன்படுகிறது. இதில் எரிக்கப்படும் நிலக்கரி 100 சதவீதம் தூய்மையாக எரிவதால் சுற்றுப்புற சூழலுக்கு நண்பனாக இருக்கிறது.
  • இந்த அமைப்பில் இருக்கும் அடுப்பை மட்டும் பயன்படுத்தி எண்ணெய் இல்லாத அப்பளம்,பப்படம், ஆக்டிவ் 2 மக்காச்சோளம் போன்றவற்றை வறுத்தெடுக்கலாம்.
  • இந்த குக்கரை சுற்றுலா செல்லும் போது கையோடு எடுத்து சென்று பயன்படுத்தலாம்.
  • சமையல் முடிந்ததும் குக்கரை திறக்காமல் இருந்தால், தயாரிக்கப்பட்ட உணவு 2 முதல் 4 மணி நேரம் வரை சூடாகவே இருக்கும்.
  • ஒரு குடும்பத்தில், அதாவது 5 நபர்களுக்கு சமையல் செய்ய 200 முதல் 250 கிராம் நிலக்கரி போதுமானது.
இந்தக்காலத்தில் உட்கார்ந்து கொண்டு நிலக்கரியை பற்ற வைக்க முடியுமா என்ற கேள்வி எழுப்புபவர்களுக்கு ஒரு பதில்....
  • சோம்பலுடன் உட்கார்நது கொண்டு சுவிட்சை போட்டவுடன் கெய்சரில் வெந்நீர் வரவேண்டும், அப்படியே வெதுவெதுப்பான தண்ணீரில் குளித்து விட்டு போக வேண்டும் என்று ஆசைப்பட்டால் உடல் சிறிது காலத்தில் சோம்பலால் எதையும் செய்ய இயலாததாக ஆகிவிடும் என்பதே உண்மை. இது போன்ற அடுப்பு ஒன்றை வாங்கி சொஞ்சம் நிலக்கரியை அடுப்பில் போட்டு, சூடத்தை எடுத்து நெருப்பை பற்ற வைத்தால் சற்று நேரத்தில் நிலக்கரி வெப்பத்தால் கணன்று தீக்கணலாக மாறிவிடும்.
  • இப்படி ஒரு செயல்முறையில் நீங்கள் இறங்கும் போது குனிந்து, நிமிர்ந்து வேலை பார்ப்பது ஒரு உடற்பயிற்சியாக மாறும்.
  • நெருப்பை தீக்கணலாக மாற்ற வாயால் அழுத்தம் கொடுத்து ஊதும் போது உங்கள் நுரையீரல் நன்றாக விரிவடைகிறது. இதனால் உடலுக்கு நிறைய பிராணவாயு கிடைக்கிறது.
  • புகை வருமே என்று கவலை வேண்டாம். இந்த அடுப்பு புகை கக்காத படி தான் வடிவமைக்கப்பட்டுள்ளது. சராய் குக்கரின் அடிப்பாகத்தில் நிலக்கரியை போட்டு பயன்படுத்துவது போன்ற வடிவமைப்பு உள்ளது. ஆனால் இப்படி இல்லாமல் தனியாக அடுப்பு போன்ற அமைப்புடன், அதன் மேல் பாத்திரத்தை வைத்து பயன்படுத்துவது போன்ற மாடலும் இருக்கிறது.


அதாவ இந்த குக்கரில் சமைப்பதால் உணவின் சுவை அதிகரிக்கிறது.எப்படி தெரியுமா? இது இயற்கை எரிபொருளான நிலக்கரியால் சமைக்கப்படுகிறது. இரண்டாவதாக நமது வழக்கமான குக்கரில் உணவு கடுமையான வெப்பத்தால் அழுத்தப்படுவது போல் இதில் அழுத்தப்படுவதில்லை. இயற்கையான வெப்பத்தில் மெல்லிய தீக்கணலில் அழுத்தமில்லாமல் உணவுகள் வெந்து வருவதால் உணவின் சுவையும்,சத்துப் பொருட்களும் அப்படியே இருக்கின்றன.


வீடுகளுக்கு, உணவு விடுதிகளுக்கு என்று தனிதனியாக மாடல்கள் உள்ளன. இது பற்றி மேலும் விவரமறிய இங்கு போய் பாருங்களேன்!!
http://www.arti-india.org/downloads/pdfs/ARTIEnergy_May2010.pdf

Samuchi Enviro-Tech Pvt Ltd,
Flat no.6.Ekta Park Co-op Hsg.Soc.,Showroom.
Law College Road.Erandawane,Pune-411 004.
Email:samuchi.envirotech@gmail.com

ந்த வகையான அடுப்புகளை போல் அல்லாமல் இதே குக்கரின் அறிவியல் தத்துவத்தில் மதுரையை சேர்ந்த பாண்டவா எனர்ஜி சொல்யூசன்ஸ் என்ற நிறுவனம் பெரிய உணவகங்கள், விடுதிகள், சிறிய மெஸ்கள் போன்ற இடங்களுக்கு விறகை எரிபொருளாக பயன்படுத்தும் அடுப்புகளை தயாரிக்கின்றனர். இவர்களது அடுப்புகளில் மழையில் நனைந்த விறகை வைத்தாலும் எரியும் என்பது தான் சிறப்பம்சம். ஒரு விறகு 2 மணி நேரத்திற்கு எரிகிறது. இதுவும் ஒரு அதிசயம் தான். இந்த அடுப்புகளை பயன்படுத்தி ஓட்டல்கள் தங்கள் வாடிக்கையாளர்களுக்கு சுவையான உணவுகளை தரலாம் என்பது உறுதி. இந்த அடுப்புகள் பற்றி விபரமறிய....99443 84012 என்ற எண்ணில் அறியலாம்.

பத்திரிகையாளர்களுக்கு பேனா ஒரு ஆயுதம். பதிவர்களான நமக்கு மொபைல் போன் ...

1 கருத்துகள்



 டிராபிக் சாமி...தமிழகத்தின் பொதுப்பிரச்சனை என்றால் கண்டுகொள்ளப்படும் பெயருக்கு சொந்தக்காரர்! தனியாக நின்று பல பொதுப்பிரச்சனைகளுக்காக நீதிமன்றத்தில் வழக்கு தொடர்ந்து மக்களின் பிரச்சனைகள் தீர வழிவகுத்த ஒருவர். நாமும் நாள் தோறும் பல இடங்களுக்கு செல்கிறோம்.

அங்கெல்லாம் பொதுநலனுக்கு மாறாக எத்தனையோ விடயங்கள் கண்ணில் தட்டுப்பட்டும வழக்கம் போல் 'உச்' கொட்டி விட்டு வந்து விடுகின்றோம்.இது போன்ற பிரச்சனைகளுக்கு நம்மால் வழக்கு தொடுத்து தீர்வு காண முடியவில்லை என்றாலும், இங்கு அந்த காட்சிகளை பதிவாக்கி வைக்கலாமே என்ற ஒரு நோக்கத்தோடு இந்த முயற்சி. கை கொடுங்கள் நண்பர்களே!

உலகம் முழுவதும் இன்று சுற்றுச்சூழல் மிகவும் விவாதிக்கப்படும் பிரச்சனையாக மாறிவிட்டிருக்கிறது. தொழில்மயம் ஆக்கலில் இது போன்ற பிரச்சனைகள் இயல்பு தானே என்றெல்லாம் பேசப்பட்டு வந்த காலம் கடந்து வருகிறது. மாற்றங்கள் மனிதனை உயர்த்துவதை விட, மனிதனுக்கே எதிராக மாறி வருவதை எப்படி சகித்துக் கொள்ள முடியும். சமீபத்தில் சுப்ரீம் கோர்ட்டு ஒரு உத்தரவிட்டிருக்கிறது. மனிதர்களை கழிவுச்சாக்கடைக்குள் இநங்கி சுத்தம் செய்வதை அனுமதிக்க கூடாது என்பதே அந்த உத்தரவு.

ஆனால் இது எந்த அளவில் கடைபிடிப்ப பட போகிறது என்று தெரியவில்லை. இப்படி கடைபிடிக்காமல் போனதால் நாம் இழந்து வருவது ஏராளம்.
வானை முட்டும் செல்போன் டவர்களால் இன்றைக்கு நகரத்தில் நாட்டுக்குருவிகளை காண முடியவில்லை. காணும் நிலங்கள் எல்லாம் நமக்கே சொந்தம் என்று நினைத்த சிலரால், ஆங்காங்கே இருந்த கண்மாய்கள்,குளங்கள் எல்லாம் கட்டிடங்களாக ஆகிவிட்டன. யார் எப்படி போனால் என்ன என்று கருதும் சிலர் ரோடுகளிலும், தெருக்களிலும் குப்பைகளை கொட்டி நாறடித்து நோயை பரப்பி விடுகிறார்கள்.

இது போல்,
  • ஊருக்கெல்லாம் உபதேசம் செய்யும் அரசின் வாகனங்கள் அடுத்தவருக்கு ஆஸ்துமா வரும் அளவு புகை கக்குவது,
  • மாநகராட்சி குப்பை வண்டியே குப்பைகளை ரோட்டில் வாரிவிட்டு செல்வது,
  • குண்டு பல்புகளை நீக்குங்கள் என்று சொல்லும் அரசு அலுவலகங்களில் பகல் வேளைகளில் கொளுந்து விட்டு எரியும் பல்புகள்,
  • மரம் நீங்கள் வளர்த்தால்..மரம் உங்களை வளர்க்கும் என்று சொல்லும் அரசு..ஆனால் மரத்தை வெட்டும் அரசு ஊழியர்கள்,
  • மருத்துமனைக்கு பக்கத்தில் மயானம் போல் சுண்ணாம்பு காளவாசல்,
  • தண்ணீரை பழித்தால் தாயை பழிப்பது போல் என்றாலும், ஆற்றில் மலக்கழிவு, இறைச்சிக்காக வெட்டப்பட்ட விலங்குகளின் கழிவுகள்,
  • சினிமா போஸ்டரை மேயும் மாடுகள்,
  • நிலத்தடி நீரை சேமிப்போம் என்று அரசு கூறினாலும், தெருக்குழாயில் திருகு இல்லாமல் வீணாக ஓடும் குடிநீர்,
  • கழிப்பிடம் இல்லாமல் ரோடுகளில் சிறுநீர் கழிக்கும் மனிதர்கள்,
  • சாக்கடை குளமாக தேங்கிக் கிடக்கின்ற இடத்தில், நல்ல குடிதண்ணீருக்காக தெருக்குழாயில் மல்லுக்கட்டும் மக்கள்,
  • ஆட்டோக்களில் ஆடு,மாடுகள் போல் திணிக்கப்பட்ட மக்கள் கூட்டம்,
  • குப்பை மேட்டுக்கு அருகில் காய்கறி சந்தை
  • ஒட்டு மொத்தத்தில் இவை அனைத்தும் ஏதோ ஒரு விதத்தில் சுகாதாரக் கேடு. மனிதருக்கும் கேடு.
இப்படி சொல்லிக் கொண்டே போகலாம். ஆனால் சொல்வதுடன் நின்று விடக்கூடாதல்லவா....


போகிற போக்கில் உங்கள் மொபைல் போனில் இந்தக்காட்சிகளை எல்லாம் புகைப்படமாக எடுங்கள்,
அப்படியே treesday@gmail.com க்கு அனுப்புங்கள். நம் பல்வேறு மாவட்ட பதிவர்களின் புகைப்படங்கள் எல்லாம் ஒரு இடத்தில் குவியட்டும். அதை சம்பந்தப்பட்டவர்களின் கவனத்திற்கு அனுப்புவோம், தீர்வு காணப்படும் என்ற நம்பிக்கையுடன்!

ஆக,பத்திரிகையாளர்களுக்கு பேனா ஒரு ஆயுதம். பதிவர்களான நமக்கு மொபைல் போன் ஒரு கருவியாக இருக்கட்டுமே!




நீங்கள் எடுத்த புகைப்படங்களுடன் உங்கள் பெயர், புகைப்படம் எடுக்கப்பட்ட இடம், எடுத்த நாள், நேரம் உள்பட விவரங்களை அனுப்புவது சிறப்பு.

கட்டுரை போட்டி அறிவிப்பு-தேர்தலில் பணச்செல்வாக்கு மற்றும் வன்முறையை தவிர்ப்பது எப்படி?

0 கருத்துகள்

சென்னையை சேர்ந்த 'நந்தினி வாய்ஸ் பார் தி டிப்ரைவ்டு' என்ற தன்னார்வ தொண்டு நிறுவனம் கல்லூரி மாணவ, மாணவியர்களுக்கு கீழ்க்கண்ட தலைப்பில் அகில இந்திய அளவில் கட்டுரை போட்டி நடத்துகிறது.

தலைப்பு: தேர்தலில் பணச்செல்வாக்கு மற்றும் வன்முறையை தவிர்ப்பது எப்படி?

கல்லூரி மாணவ மாணவியர்களை மேற்கூறிய பிரச்சனைகளைப் பற்றி ஆலோசிக்க ஊக்கப்படுத்தி அவர்களின் கருத்துக்களை வெளியிட வாய்ப்பளித்து, அவர்களின் பரிந்துரைகளை மத்திய அரசு மற்றும் தேர்தல் ஆணையம் தெரிந்து கொள்வதற்காக, நந்தினி வாய்ஸ் பார் தி டிப்ரைவ்டு கல்லூரி மாணவ.மாணவியருக்கு இந்த போட்டியை நடத்துகிறது.

இந்த போட்டியில் கலந்து கொள்ள விதிமுறைகள்

  • இந்தியாவிலுள்ள அனைத்துக்கல்லூரி மாணவ மாணவியர்களும் இக்கட்டுரைப் போட்டியில் கலந்து கொள்ளலாம்.
  • போட்டிக் கட்டுரையானது தமிழ், ஆங்கிலம்,இந்தி ஆகிய மொழிகளில் ஏதாவது ஒரு மொழியில் 1500 வார்த்தைகளுக்கு மிகாமல் எழுதப்பட வேண்டும்.
  • கட்டுரைகள் மின்னஞ்சல் மூலமாகவோ அல்லது தபால் மூலமாகவோ அனுப்பலாம்.
  • பத்து சிறந்த கட்டுரைகளுக்கு பரிசு அளிக்கப்படும்.

போட்டிக்கட்டுரை கீழ்க்கண்ட முகவரிக்கு ஜனவரி 10 ஆம் திகதிக்குள் வந்து சேர வேண்டும் என்று இந்த நிறுவனம் அறிவித்துள்ளது.

தொடர்புக்கு
என்.எஸ்.வெங்கட்ராமன், நிறுவனர்.
நந்தினி வாய்ஸ் பார் தி டிப்ரைவ்டு,
எம்.60-1, 4 வது குறுக்கு தெரு, பெசண்ட் நகர், சென்னை-600 090.
தொலைப்பேசி எண்: 044-2491 6037. 2446 1346

மின்அஞ்சல்: nsvenkatchennai@gmail.com
இணையதளம்:         http://www.nandinivoice.org/

நீங்கள் சிறுகதை எழுத்தாளரா? உங்களுக்கு ஒரு வாய்ப்பு

0 கருத்துகள்

பொது தகவல் அறிவிப்புகள்




ன்றைக்கு நம்மில் மாற்றுத்திறனாளிகள் பலர் பல்வேறு சாதனைகளை செய்து புகழ்படைத்துள்ளார்கள். அவர்களை மேலும் ஊக்குவிக்கும் விதமாக மதுரையை சேர்ந்த 'அதிதி'( அன்னை திறனேற்ற பயிற்சி திண்ணை) என்ற அமைப்பு தமிழ்சிறுகதை ஆர்வமுள்ள எழுத்தாளர்களுக்கு ஒரு போட்டியை அறிவித்துள்ளது.
மாற்று திறனாளிகள் மறுவாழ்வு பற்றிய விழிப்புணர்வு வளரும் நோக்கத்துடன் இந்த போட்டி அறிவிக்கப்பட்டுள்ளது.

  • தலைப்பு   -'இறைவன் கொடுப்பது ஒரு வாழ்வு, மனிதன் கொடுப்பது மறுவாழ்வு'

தேர்வு செய்யப்படும் சிறந்த 3 சிறுகதைகளுக்கு பரிசும், பாராட்டும் வழங்கவுள்ளது இந்த அமைப்பு.

மேலும் இது பற்றிய விபரங்களுக்கு
வி.ஆர்.கணேஷ்.
நிர்வாக இயக்குநர்,
அன்னை திறனேற்ற பயிற்சி திண்ணை.
93441 25161 என்ற எண்ணில் தொடர்பு கொள்ளலாம்.

இயற்கையாகவே மனிதருக்கு இரங்கும் சிந்தனை கொண்டவர்கள் இந்த போட்டியில் கலந்து கொண்டு உஙகள் திறனை வெளிக்கொண்டு வரலாம். எடுங்கள் பேனாவை, எழுதுங்கள் உங்கள் மனவோட்டத்தை.......நன்றி!

தயவு செய்து இந்த செய்தி எழுத்து திறன் மிக்கவர்களை சென்று சேர வாக்களியுங்கள் சகோதரர்களே!

உங்கள் பணம் உங்களுக்கே தெரியாமல் குப்பைக்கு போகுது...தெரியுமா?

6 கருத்துகள்

நீங்கள் மாதம் 10 ஆயிரம் ரூபாய் சம்பாதிப்பவரா? அப்படியானால் உங்களுக்கே தெரியாமல் 150 ரூபாய் குப்பைக்கு போகிறது. அது எப்படியென்று தெரியுமா? நீங்கள் உங்கள் பயன்பாட்டுக்காக வாங்கிய பெர்ப்யூம் அடங்கிய ஈயா கேன், கண்ணாடி பாட்டில்கள், தீர்ந்து போன ரீபிள்கள், டப்பாக்கள் என்று அவை தீர்ந்து போன பிறகு குப்பைக்கு போகிறதே...அது தான் உங்கள் பணம். மறைமுகமாக நீங்கள் உங்கள் பணத்தை குப்பையில் தூக்கி எறிகிறீர்கள்.

சரி...இப்படி காலியான பாட்டில், டப்பா,கண்ணாடி,பாலிதீன், காகிதங்கள் என்று அத்தனையையும் வீட்டின் மூலையில் ஒரு சாக்கில் சேமித்து வைத்து மாதம் ஒரு முறை பழைய பேப்பர் கடையில் போட்டால் எனன விலைக்கு போகும் என்று ஒரு பரிசோதனை செய்து பாருங்கள். அப்போது தான் தெரியும். இவ்வளவு நாளாக நீஙகள் எவ்வளவு பணத்தை இழந்திருக்கிறீர்கள் என்று!
பாலிதீன் பைகளை பயன்படுத்தக் கூடாது என்று அரசு தடைவிதித்தாலும், நம் அன்றாட வாழ்வில் பாலிதீன் பைகள் இணைந்து விட்டன. இந்த தொழிலை நம்பி பல லட்சம் குடும்பங்கள் இருக்கின்றன.

இப்போது இந்த பாலிதீன் பைகளை எல்லாம் ஒன்று சேர்த்து இயந்திரத்தில் போட்டு அரைத்து சிறுசிறு துகள்களாக ஆக்கி,பின்னர் வெப்பத்தில் உருக்கி ரோடு போட பயன்படுத்துகிறார் மதுரையை சேர்ந்த பேராசிரியர் ஒருவர். சரி இது பற்றிய தகவர் தனி பதிவில் போடுகிறேன்.
இப்போது...நாம் தூக்கி எறியும் இது போன்ற குப்பைகளின் மதிப்பு பற்றி பார்க்கலாம்.
  • தரமான பாலிதீன் பைகளில் இருந்து பிளாஸ்டிக் ஹோஸ்,பிளாஸ்டிக் டப்பாக்கள் தயாரிக்கிறார்கள். அதாவது சின்டெக்ஸ் தொட்டி போன்றவை தொடங்கி பைப்புகள் வரை தயாரிக்கிறார்கள். நாம் தூக்கி போடும் பாலிதீன் பைகளை இது போன்ற பொருட்கள் தயாரிக்க வாங்கிக் கொள்கிறார்கள். ஆக..பாலிதீன் பைகளை சேர்த்து வைத்தால் கிலோ ஒன்றுக்கு 10 ரூபாய்க்கு எடுத்துக் கொள்கிறார்கள்.
  • பிளாஸ்டிக்கில் 'கடக்' பிளாஸ்டிக் என்று ஒரு வகை. அதாவது கையால் உடைத்தால் உடைந்து போகும் ரகம். இது கிலோ ஒன்றுக்கு விலை 4 ரூபாய். இந்த பிளாஸ்டிக்கை இரண்டாம் தர பிளாஸ்டிக் என்கிறார்கள். இந்த வகை பிளாஸ்டிக்குகள் பெயிண்ட் பிரஷ் கைப்பிடி, குடம் தயாரிக்க போகிறது.
  • நீஙகள் டிவி.மிக்சி என்று பொருட்கள் வாங்கும் போது அட்டையில் சுற்றி பேக்கிங் செய்து வரும். இந்த வகை அட்டை பெட்டிகள் கிலோ 3 ரூபாய்க்கு போகிறது. இந்த அட்டைகள் மீண்டும் புதிய பேக்கிங் அட்டைகள் செய்ய பயன்படுகிறது.
  • சிகரெட் பெட்டிகள் கிலோ ஒன்றுக்கு 2 ரூபாய் வரை விலை தருகிறார்கள். இந்த சிகரெட் பெட்டிகளை மறுசுழற்சி செய்து மீண்டும் அட்டைகள், பேப்பர் தயாரிக்க பயன்படுத்துகிறார்கள்.
  • பிளாஸ்டிக் வயர்களை துண்டுதுண்டாக கிடந்தால் அவற்றையும் குப்பையில் போடுவோம். ஆனால் அவற்றின் உள்ளே உள்ள காப்பர் கம்பியின் விலை கிலோ ரூ.80 க்கு வாங்கிக் கொள்கிறார்கள்.
  • தேங்காயை எடுத்து சட்னி அரைத்து விட்டு சிரட்டையை தூக்கி எறிந்து விடுவோம். இது போன்ற சிரட்டையின் மதிப்பு 1 டன் ரூ.2500க்கு விலை போகிறது. இந்த சிரட்டையை வைத்து செங்கல் சூளையில் விறகுக்கு பதிலாக செங்கலை சுட பயன்படுத்துகிறார்கள். இது தவிர கொசுவர்த்தி, தயாரிக்கவும் சிரட்டை பயன்படுகிறது.
  • பால் கவர்கள் கிலோ ரூ.10 முதல் 15 வரை கொடுத்து வாங்கி கொள்கிறார்கள்.
  • தகரம் கிலோ 4 ரூபாய்க்கும், பழைய இரும்பு கிலோ 12 ரூபாய் முதல் 15 ரூபாய் வரை கொடுத்து வாங்கிக் கொள்கிறார்கள்.
  • வீட்டில் தினமும் டீ தயாரித்து சாப்பிடுகிறீர்களா? வீணாகும் டீத்தூளை அப்படியே சேர்த்து வைத்திருங்கள். இவற்றை வைத்து உரம் தயாரிக்கிறார்கள். காபி தூளிலிருந்தும் தான் இப்படி உரம் தயாரிக்கிறார்கள். ஆக..வீணான இந்த டீ.காபி தூள்களில் விலை 10 கிலோவுக்கு 5 ரூபாய் தருகிறார்கள்.
  • பெட்பாட்டில் வாங்கி விட்டு தூக்கி போடாதீர்கள். வீணான பெட்பாட்டிலின் விலை கிலோ 8 ரூபாய்.
  • பழைய வெள்ளை பேப்பர் கிலோ ஒன்றுக்கு 6 முதல் 10 வரை கிடைக்கும்.
  • அரசு அலுவலகங்களிலிருந்து வரும் பேப்பர் கழிவுகள் மற்றும் பிரிண்டிங் பிரஸ் கழிவுகளிலிருந்து வெள்ளை பேப்பர் கழிவுகளை மறு சுழற்சி செய்து மீண்டும் பேப்பர்கள் தயாரிக்கிறார்கள்.
  • அலுமினியம் பாயில் பேப்பர்( உணவு பொருட்களை பார்சல் செய்ய பயன்படுவது) கிலோ 18 ரூபாய்க்கு வாங்குகிறார்கள். இதை மறுசுழற்சி செய்து அலுமினிய பேப்பராக மீண்டும் செய்கிறார்கள்.
  • தலைமுடி கிலோ 1 ரூபாய் முதல் 2 ரூபாய்க்கு எடுத்துக் கொள்கிறார்கள்.
  • நெர்லான் செருப்புகள் கிலோ 8 ரூபாய்க்கு விலை போகிறது.
  • வீணான டியூப்லைட் ஒன்றுக்கு 1 ரூபாய் விலை நிர்ணயித்து வாங்குகிறார்கள்.
  • ரப்பர் கழிவுகள்,டயர்களை மறுசுழற்சி செய்து ரப்பர் பொருளாக தயாரிக்கிறார்கள். எனவே வீணான டயர்கள், டியூப்களை வைத்திருங்கள். இவற்றை கிலோ 5 முதல் 10 வரை தருகிறார்கள்.

ஆக...இனி எதையும் வீட்டுக்கு வெளியே தூக்கி போடும் போது ஒரு முறை சிந்தியுங்கள். அது உங்கள் பணம். அப்படியே வைத்திருந்து மாதம் ஒரு முறை பழைய பேப்பர்காரரிடம் கொடுங்கள். அவர் உங்களுக்கு ரூபாய் நோட்டுக்களை திருப்பி தருவார். இந்த பழக்கத்தை பார்க்கும் உங்கள் குழந்தைகளும் எதையும் வீணாக்காமல் இருக்க கற்றுக் கொள்வார்கள்.

இத்துடன் ஒரு விழிப்புணர்வு மற்றும் எச்சரிக்கை செய்தி.

நீங்கள் ஏன் குப்பைகளை வீணாக ரோட்டில் எறியக்கூடாது? பேட்டரி செல், பெயிண்ட் டப்பாக்கள்,பினாயில் பாட்டில், பேனாரீபிள் உள்பட சில கழிவுகளை அபாயகரமான கழிவுகள் பட்டியலில் சேர்த்திருக்கிறார்கள்.காரணம், இவை பூமியில் தூக்கி எறியப்படும் போது, மக்காமல் அப்படியே பல ஆயிரம் ஆண்டுகளுக்கு இருக்கும் போது மோசமான விளைவுகளை ஏற்படுத்துகிறது. அதாவது பால்பாயிண்ட் பேனாரீபிளில் பாலிவினைல் குளோரடு என்ற வேதிப்பொருள் இருக்கிறது. இந்த ரசாயனம் மண்ணை கடுமையாக பாதிக்கிறது. நிலத்தடி நீரை பூமிக்குள் செல்லவிடாமல் தடுக்கின்றன.
வீட்டில் ப்யூஸ் ஆன டியூப்லைட்டுகளை குப்பையில் போடும் போது அதை சிறுவர்கள் டமார் என்று கல்லை தூக்கி போட்டு உடைப்பார்கள். இந்த ட்யூப்லைட்டை உடைக்கும் போது வெளிப்படும் பாதரசம் பூமியில் 300 அடி தூரம் வரை போகுமாம்.இந்த பாதரசம் செடி,கொடிகள்,பயிர்கள் வளர பூமியில் இருக்கும் நைட்ரஜன் சத்தை இல்லாமல் ஆக்கி விடுமாம்.

மக்களை பற்றி எதுவும் அக்கறை இல்லாத சில மருத்துவமனைகள் நோயாளிகளுக்கு சிரிஞ்ச் மூலம் ஊசி போட்டு விட்டு அந்த சிரிஞ்சுகளை அப்படியே குப்பையில போடுகிறார்கள். சில மோசமான குணம் கொண்ட தொழில் நபர்கள் இந்த வகையான பிளாஸ்டிகள் சிரிஞ்சுகளை வெப்பத்தில் எரித்து தண்ணீர் குடங்கள் செய்வது தான் கொடுமை.
இவையெல்லாம் ஒரு புறம் இருந்தாலும் தற்போது பெய்த மழையில் நகரின் பல சாக்கடைகள் அடைத்துக் கொண்டதால் த்ான் தண்ணீர் முறையாக வெளியேற வழியில்லாமல் இந்த குப்பைகள் அடைத்துக் கொண்டதும் ஒரு காரணம்.

ஆக...இனியாவது குப்பைகளை வீண் என்று தூக்கி எறியும் முன் ஒரு நொடி சிந்திப்ப்போம். இதை உங்கள் வீட்டில் இருந்தே தொடங்குங்கள். நாளை உங்கள் குழந்தை எதையும் வீணாக்க துணியாது. காசின் மதிப்பை எதிர்கால சந்ததிக்கு கற்றுக் கொடுக்க இதுவும் ஒரு ஐடியா!

நைட்ரஜன் நிரப்பி இழப்பை குறைப்போம்

8 கருத்துகள்

 

னிதனின் கண்டுபிடிப்புகளில் முக்கியமான ஒன்று சக்கரம். இது கண்டுபிடிக்கப்பட்ட பின்னர் தான் மனிதன் கால்நடையிலிருந்து வாகனத்திற்கு தாவினான். இன்றைக்கு இருக்கும் சாதாரண பைக்குகள்,கார்கள் முதல் ரோடு ரெயில்கள் என்று சொல்லப்படும் 30 க்கும் மேற்பட்ட சக்கரங்களை கொண்ட பிரமாண்டமான சுமை இழுக்கும் லாரிகள் வரை ரப்பர் கொண்டு உருவாக்கப்பட்ட டயர்கள் தான் வாகனத்தை பல ஆயிரம் கிலோ மீட்டர் தூரத்திற்கு ஓட வைக்கின்றன. இந்த டயர்களின் உள்புறத்தில் காற்று அடைக்கப்பட்ட டியூப்கள் இருக்கின்றன. என்ன தான் ட்யூப்லெஸ் டயர்கள் வந்து விட்டாலும் கூட இன்றும் சொகுசான பயணத்திற்கு ட்யூப் பொருத்தப்பட்ட டயர்கள் தான் பொருத்தமானதாக கருதப்படுகின்றன.

இந்த ட்யூப்களில் வழக்கமாக சாதாரண காற்று தான் அடைக்கப்படுகிறது. கம்ப்ரசர்களின் மூலம் சுற்றுப்புற காற்று பிடிக்கப்பட்டு டயர்களில் நிரப்பப்படுகிறது. பல லட்சங்கள் கொடுத்து கார்கள் வாங்கினாலும் பத்து ரூபாய்க்கு காற்று நிரப்பாவிட்டால் கார் இம்மியளவு கூட நகராது. ஆனால் இப்படி நிரப்பப்படும் சாதாரண காற்றை வாகனங்களுக்கு பயன்படுத்துவது பொருத்தமானது தானா என்ற கேள்வி இப்போது எழுந்துள்ளது. காரணம், இந்த சாதாரண காற்று (ஆக்சிஜன்) வாகனங்கள் இயங்கும் போது, ஓடும் போது கடுமையாக சூடாகி விடுகின்றன. இப்படி வெப்பமடையும் போது இந்த காற்று டயர்களில் உள்ள நுண்துளைகளில் வழியே மிகமிக மெதுவாக வெளியேறிக் கொண்டே இருக்கிறது.

வாகனத்தை நாம் புதிதாக வாங்கும் போதே டயர்களின் ஏர் பிரஷர் எவ்வளவு இருக்க வேண்டும் என்று சொல்வார்கள். ஆனால் நாம் என்ன தான் அவர்கள் சொல்லிய அளவில் காற்றை நிரப்பி வைத்தாலும், மேலே சொன்ன காரணப்படி டயரிலிருந்து காற்று வெளியேறி விடுவதால் வாகனத்தின் தயாரிப்பாளர்கள் சொன்ன 'ஏர் பிரஷர்' எப்போதும் டயர்களில் இருப்பதில்லை. வாகனத்தயரிப்பாளர் கூறிய படி போதிய காற்று டயர்களில் இருக்கும் பட்சத்தில் தான் வாகனம் எந்த பிரச்சனையும் இல்லாமல் பனிச்சறுக்கில் சறுக்குவது போல் எளிதாக ஓடும். பஞ்சர் ஆன வாகனத்தை சிறிது தூரம் கூட நகர்த்த முடியாது. அதாவது ட்யூப்பில் முழுமையாக காற்று இல்லாத பட்சத்தில் வாகனம் இம்மி கூட நகருவதில்லை.

அது போல் வாகனத்தயாரிப்பாளர் சொல்லியபடி காற்று இல்லாமல் குறைவாக இருக்கும் நிலையில் வாகனத்தின் இயங்கு நிலை எங்கோ ஒரு இடத்தில் குறைந்து போகின்றது என்று தானே அர்த்தம்.
ட்யூபில் மிகமிக குறைந்த அளவு காற்று குறைபாடு ஏற்படும் போது இந்த இயங்கு குறைபாடு நமக்கு பெரிதாக தெரிவதில்லை. ஆனால் ஆணித்தரமாக சொல்லப் போனால் இந்த காற்று குறைபாடு வாகனத்தின் ஏதோ ஒரு உந்துசக்தியை எங்கிருந்தோ குறைக்கிறது என்று தான் பொருள். இப்படி கூடுதலாக தேவைப்படும் உந்து சக்தியை பெற, வாகனத்தின் எரிபொருள் அதிகமாக செலவழிக்கப்படுகிறது. இதனால் எரிபொருள் நமக்கே தெரியாமல் வீணாக செலவழிக்கப்படுகிறது. இப்படி காற்று குறைவான டயரால் இது மட்டுமா பாதிப்பு?

டயரின் பட்டன் வேகமாக தேய்கிறது. காற்று குறைவான டயர்களால் வாகனம் நமது கட்டுப்பாட்டில் இருப்பதில்லை. அதிகமான இழுவைத்திறன் என்ஜினுக்கு போகும் போது என்ஜினின் ஆயுள்காலமும் குறைகிறது. மேலும் இதனுடன் தொடர்புடைய பல்வேறு உதிரிபாகங்களும் தேய்வடைந்து விரைவில் பழுதாகிவிடுகின்றன.

பொதுவாக வண்டி ஓடும் போது டயர்கள் படுபயங்கர வெப்பமடையும். இந்த வெப்பம் ட்யூப்களில் நிரப்பப்பட்டிருக்கும் காற்றில் உள்ள காற்று அணுக்களில் ஒரு ரசாயன மாற்றத்தை ஏற்படுத்தும். டயரின் வெப்பம் டயரை தாண்டி ட்யூயை நெருங்கும் போது ட்யூப்பில் இருக்கும் காற்று அணுக்கள் வெப்பத்தால் விரிவடைகின்றன.இதனால் மேலும் அந்த அணுக்கள் சூடாகிவிடுகின்றன. நீண்ட தூரம் ஓட்டி வந்து நிறுத்தப்பட்ட காரின் டயர்களை தொட்டு பார்க்கவே முடியாது. அந்த அளவு சூடாக இருக்கும்.இதற்கு காரணம் காற்று அணுக்கள் சூடாகி இருப்பது தான்.

இப்படி அணுக்கள் சூடாகி விரிவடையும் போது ஒரு கட்டத்திற்கு மேல் இவை விரிவடைய முடியாமல் வெடித்து சிதறுகின்றன. அதாவது ட்யூப் காற்றின் அழுத்தத்தை தாங்க முடியாமல் வெடித்து விடுகிறது. ஆளில்லாத இடங்களில் இப்படி நடந்தால் நமது பயணம் குலைந்து எரிச்சலை ஏற்படுத்தி விடும். டயர் பஞ்சர் பார்க்கும் நபர்களை அழைத்து வந்து சரி செய்வதற்குள் போதும் போதுமென்று ஆகிவிடும்.

ஆக...இந்த பிரச்சனைகள் எல்லாம் நமது வாகனத்திற்கு வராமல் இருக்க வேண்டும் என்றால், வாகனத்தின் டயர்களில் நிரப்பப்படும் காற்று எளிதாக வெப்பத்தினால் ரசாயன மாற்றத்திற்கு உள்ளாகாத ஒன்றாக இருக்க வேண்டும். அப்படி நிரப்பப்படும் காற்றின் அணுக்கள் டயரில் ஏற்படும் வெப்பத்தை ஈர்த்து சூடடையக் கூடாது. எப்போதும் குளிர்ச்சியாக இருக்க வேண்டும். இது தான் தீர்வு.

இப்படி ஒரு காற்று தான் தற்போது வாகனங்களுக்கு நிரப்பப்பட்டு வருகிறது. சென்னை, மும்பை,பெங்களுரு உள்ளிட்ட நகரங்களில் இந்த காற்று பரவலாக நிரப்பப்படுகிறது. ஆனால் இந்தியாவின் மற்ற நகரங்களில் இது பற்றி அவ்வளவாக தெரியவில்லை. 'நைட்ரஜன் ஏர்' என்று கூறப்படும் இந்த காற்றின் அனுகூலங்களை பார்க்கலாம். நைட்ரஜனின் இயல்பு குளிர்ச்சியாக இருப்பது. இது எங்கு இருக்கிறதோ அந்த இடத்தை குளிர்ச்சியாக வைத்திருக்கும். இதை வைத்து கீழே உள்ள பயன்களை படியுங்கள்.
  1. சாதாரணமாக ட்யூப்பில் அடைக்கப்படும் பிராணவாயுவான காற்று ட்யூப்பிலிருந்து நுண்துளை வழியாக கசிந்து கணக்கிட இயலாத வகையில் மிகமிக நுண்ணிய அளவில் வெளியேறிக் கொண்டே இருக்கும். காரணம் இந்த பிராணவாயுவான ஆக்சிஜன் அணுவானது மிக மிக சிறிய அணுவால் ஆனது. அதனால் ட்யூபின் நுண்ணிய துளை வழியே வெளியேறும் தன்மை கொண்டது. ஆனால் நைட்ரஜன் அணுக்களுக்கு இந்த தன்மை கிடையாது. காரணம், நைட்ரஜன் அணு அளவில் பெரியது. அதனால் நைட்ரஜன் ட்யூப்பிலிருந்து கசிந்து வெளியேறுவதில்லை. இதனால் ட்யூபில் ஒரு முறை நிரப்பப்பட்ட காற்று பல மாதங்களுக்கு அப்படியே சீரான அளவில் ட்யூபில் இருந்து கொண்டே இருக்கும்.
  2. நைட்ரஜன் அணுவானது சுற்றுப்புற வெப்பத்தை ஈர்த்துக் கொள்வதில்லை. இந்த தன்மையால், ட்யூப்பில் நிரப்பப்படும் நைட்ரஜன் எப்போதும் குளிர்ச்சியாக இருக்கும். இதனால் டயர்கள் வெப்பமடையாது. வெப்பமடையாத காரணத்தால் டயர்கள் தேய்வதில்லை. இதனால் தேவையில்லாமல் குறிப்பிட்ட காலத்திற்கு முன்னதாகவே டயர்,ட்யூப்களை மாற்ற வேண்டிய அவசியம் வராது. டயர்,ட்யூப் மற்றும் என்ஜனின் ஆயுள்காலம் அதிகரிக்கும்.
  3. சாதாரண காற்றில் எப்போதும் கண்ணுக்கு தெரியாத அளவிலும் உணரமுடியாத வகையிலும் சற்று ஈரப்பதம் இருக்கும். இந்த ஈரப்பதமானது டயரின் ஓரத்தில், அதாவது டயரின் ஓரங்களை இணைத்திருக்கும் ஒரு வட்ட வடிவமான இரும்புக்கம்பியை மெல்ல மெல்ல அரித்து விடும். ஆனால் நைட்ரஜன் காற்றில் ஈரப்பதம் கிடையாது. இதனால் டயரின் இணைப்பான கம்பி வளையம் எந்த சேதமும் அடையாமல் டயரை பாதுகாக்கும்.
  4. நைட்ரஜன் ட்யூப்பை விட்டு வெளியேறாத காரணத்தால் வாகனம் எப்போதும் துல்லியமாக ஓட்டுனரின் கட்டுப்பாட்டில் இருக்கும். இதனால் மைலேஜீம் நன்றாக கிடைக்கும். என்ஜின் சுமை இல்லாமல் இயல்பான திறனுடன் இயங்கும்.
  5. நல்ல வேகத்தில் சாதாரண காற்று நிரப்பப்பட்ட டயர் வெடிக்கும் போது, வாகனம் ஓட்டுனரின் கட்டுப்பாட்டை மீறி தறி கெட்டு ஓடி எங்காவது முட்டிக் கொண்டு நிற்கும். அதாவது சாதாரண பிராணவாயுவின் அணுக்கள் மிகுந்த சூட்டை அடைந்திருக்கும் நிலையில் அது வெடிக்கும் போது பலத்த வீரியத்துடன் நாலாபக்கத்திலும் சிதறும். ஆனால் நைட்ரஜன் வாயுவுக்கு அந்த அளவு அழுத்தம் இல்லை. ஏதோ ஒரு காரணத்தால் ட்யூப் வெடித்தால் கூட வாகனம் தறிகெட்டு ஓடாது. அங்கேயே நின்று விடும்.
  6. சாதாரண காற்று நிரப்பட்ட வாகனத்தை ஒரு குறிப்பிட்ட தூரத்திற்கு ஓட்டும் போது வண்டியின் டயர்கள் படுபயங்கரமான சூட்டை அடையும்.சென்னையிலிருந்து மதுரைக்கு கிளம்பி செல்லும் போது எங்காவது ஒரு இடத்தில் சாப்பிட நிறுத்துவார்கள். நீங்கள் அந்த பஸ்ஸின் டயரை தொட்டுப்பாருங்கள். இரும்பு உலையில் கைவத்தது போல் இருக்கும்.
  7. ஆனால் நைட்ரஜன் நிரப்பப்பட்ட வாகனத்தில் டயர்கள் எவ்வளவு தூரம் ஓடினாலும் பெரிய அளவு சூடு இருக்காது.
நைட்ரஜன் வாயுவால் என்ன வகையான சேமிப்பு கிடைக்கும் என்று ஒரு கணக்கீடு செய்துள்ளார்கள். இதோ....
  • நைட்ரஜன் வாயு நிரப்பப்பட்ட வாகனம் சாதாரண ஆக்சிஜன் வாயு நிரப்பபட்ட டயர் உடைய வாகனத்துடன் ஒப்பிடும் போது அவ்வளவு எளிதாக பஞ்சர் ஆவதில்லை. அதாவது நைட்ரஜன் வாயு நிரப்பப்படும் போது வாகனம் பஞ்சர் ஆவதற்கான வாய்ப்பு 50 சதவீதம் குறைந்து விடுகிறது.
  • நைட்ரஜன் வாயு நிரப்பப்பட்ட வாகனத்தில் 5 முதல் 6 சதவீதம் எரிபொருள் சேமிப்பு கிடைக்கிறது.
  • ஆக....இந்தியாவில் ஓடும் அரசு மற்றும் தனியார் வாகனங்கள் அனைத்திலும் நைட்ரஜன் காற்றை நிரப்பி தான் ஓட்ட வேண்டும் என்று சட்டம் கொண்டு வந்தால் டயர்,ட்யூப் மற்றும் இயந்திர உதிரிபாகங்களின் அனாவசியமான தேய்மானம் குறைந்து இயற்கையை பாதுகாக்கலாம். டயர்கள், ட்யூப்களுக்காக அதிக அளவு ரப்பர் இறக்குமதி செய்யப்படுவது குறைக்கப்படும். எரிபொருள் வீணாக செலவாகாது. இப்படி சொல்லிக் கொண்டே போகலாம்.
  • இதில் ஒன்றை மட்டும் உறுதியாக சொல்ல முடியும்.
இந்தியா முழுவதும் ஓடும் வாகனங்களில் சரியான அளவில் டயர்களில் காற்று நிரப்பப்படாமல் ஓட்டப்படுவதால், நாளொன்றுக்கு நாட்டில் ஓடும் வாகனங்களால் 2 லட்சம் லிட்டர் அளவுக்கு எரிபொருள்களான டீசல், பெட்ரோல் வீணாகிறதாம். 1 லிட்டர் பெட்ரோல், டீசல் விலையை வைத்து கணக்கிட்டுக் கொள்ளுங்கள். இந்த அளவு இழப்பு சாதாரண காற்றை வாகனத்தில் சரியான அளவில் வைக்காததால் ஏற்படுகிறது. இது எவ்வளவு பெரிய இழப்பு?
      இன்றே உங்கள் வாகனத்திற்கு நைட்ரஜன் நிரப்பி இழப்பை குறைப்போம்.இயற்கையை காப்பாற்றுவோம். கூடவே நமது வாகனத்தையும் நம்மையும்!

      சுற்றுச்சூழல் சீரழிவால் ஏழைகளை கொல்லும் ஒரு பயங்கர நோய்-தேவை மனித நேயம்

      0 கருத்துகள்

      வாழும் போதே சாவது...என்பார்களே அதை அனுபவித்து பார்ப்பது அரிது.ஆனால் யானைக்கால் நோயாளிகளை கேட்டால் அதன் வேதனை தெரியும். எய்ட்ஸ்,தொழுநோய், சிக்குன்குனியா,டெங்கு போன்ற நோய்களின் மீது அரசாங்கம் காட்டிய அக்கறையை இந்த யானைக்கால் நோய் மீது காட்டவில்லை என்று தான் சொல்ல வேண்டும்.

      தமிழ்நாட்டில் மெல்லமெல்ல பரவி வருகிறது யானைக்கால் நோய்.மக்களிடம் இந்த நோயின் தாக்கம் மிக மெதுவாக இருப்பதால் என்னவோ,அரசும் பெரிதாக அலட்டிக் கொள்ளவில்லை. தமிழ்நாட்டின் ஒவ்வொரு மாவட்டத்திலும் எத்தனை யானைக்கால் நோயாளிகள் இருக்கிறார்கள் என்ற விவரம் அரசிடம் சரியான புள்ளிவிவரங்களுடன் இல்லை என்பதே உண்மை.

      மருத்துவ உலகம் மிக வேகமாக நவீனப்பட்டுக் கொண்டிருந்தாலும் யானைக்கால் நோய்க்கு என்று ஸ்பெசாலிட்டி டாக்டர்கள் இல்லை என்பதும் ஒரு துரதிர்ஷ்டம். இதனால் என்னவோ இந்த நோயை பற்றி பெரிதாக ஆய்வுகளும் இல்லை என்றே கூற வேண்டும். மனிதனை  கொல்லும் இந்த நோய்க்கு காரணம், சாதாரண கொசு என்பது ஆச்சரிமில்லை.
      கொசுவால் தான் உலகின் பல இடங்களில் விதவிதமான பெயர்களில் தொற்று நோய் பரவி மரணங்கள் சம்பவித்திருக்கின்றன. ஆனால் வழக்கம் போல சே...இது சாதாரண கொசு என்று விட்டு விடுகிறோம்.
       யானைக்கால் நோயின் தீவிரம் மெல்ல உயருகிறது என்பதை காட்ட இந்த பதிவு ஒரு எச்சரிக்கை ரிப்போர்ட்.

      கால்களில் கரடுமுரடான பார்க்கவே முகம் சுளிக்க வைக்கும் மிகப்பெரிய வீக்கம், அந்த வீக்கத்திலிருந்து வடியும் நீர்,அதிலிருந்து கிளம்பும் துர்நாற்றம் உடலை விட பெரியதாக இருக்கும் காலை தூக்கி வைத்து நடக்கவே சிரமம். இது தான் ஒரு யானைக்கால் நோயாளியின் தோற்றம். அங்கொன்றும் இங்கொன்றுமாக இவர்களை காணலாம். இப்படி தோற்றத்தில் இருப்பவர்களை கண்டால் அறுவருப்புடன் விலகி நடந்து செல்வோம். இவர் யானைக்கால் நோயால் அவதிப்படும்  நோயாளி.

      இந்த நோய் இனி எப்படி வருகிறது என்று பார்க்கலாம். இந்த நோய்க்கு காரணம் wucheria bancrofti என்ற கிருமி தான். இது தவிர brugia malayi, brugia timori என்ற உருண்டைப் புழுக்களும் இந்த நோயை பரப்புகின்றன. இந்த கிருமிகளை பரப்புவது கியூலக்ஸ் மற்றும் மன்சானியா என்ற கொசுக்கள் .
      இந்த  கொசுக்கள் ஒரு மனிதனை கடிக்கும் போது அதன் முட்டைகள் மனித உடலுக்குள் புகுந்து விடுகிறது. புழுப்பருவத்தில் உள்ள அவை மனிதனின் நிணநீர் குழாய்களுக்குள் சென்று உட்கார்ந்து கொள்கின்றன. மனிதனின் இயங்கு மண்டலத்தை இந்த நிணநீர்கள் தான் கட்டுப்படுத்துகின்றன.
      ஒரு பால்பாயிண்ட் பேனாவின் ரீபிளின் அளவுக்கும் குறைவாக உள்ள இந்த நிணநீர் குழாய்களில் வாழும் புழுக்கள்,  ஒரு கட்டத்தில்  அளவில் பெரிதாக மாறி விடுகின்றன. இவை மேலும் பல குஞ்சுப்புழுக்களை உற்பத்தி செய்கின்றன. இந்த குஞ்சு புழுக்களும் வளர்ந்து பெருகுகின்றன. இப்படி மனித உடலுக்குள் வளரும் புழுக்களால், ஒரு கட்டத்தில் மனிதனின் நிணநீர் குழாய்கள் அடைபட்டு போகின்றன.

      மனிதனின் இயங்கு மண்டலத்தை கட்டுப்படுத்தும் நிணநீர் மனித உடலில் தங்கு தடையின்றி போய்வர வழியில்லாத காரணத்தால் ஒரு இடத்தில் அடைபடுகிறது. குறிப்பாக கால் பகுதியில் தான் இதன் பாதிப்பு ஏற்படுகிறது. இந்த நிலையில் காலில் ஏற்படும் அடைப்பால் கால் வீங்கி, அழுக தொடங்குகிறது. ஒரு கட்டத்தில் காலில் வெடிப்பு ஏற்பட்டு துர்நாற்றத்ததுடன் கூடிய நீர் வடிய தொடங்குகிறது. இந்த நாற்றம் சகிக்க முடியாதது. இதனால் யானைக்கால் நோயாளிகள் எங்கும் நடக்கமுடியாமல் முடங்கி போகிறார்கள். நோய் பரவி விடும் என்ற பயத்தால், இவர்களை யாரும் அருகில் நெருங்கி பார்க்க கூட பயப்படுவதுண்டு.

      இந்த யானைக்கால் நோயின் பாதிப்பு மருத்துவ உலகத்தால் 4 கட்டங்களாக பிரிக்கப்பட்டுள்ளது. முதல் மற்றும் இரண்டாவது கட்டத்தில் யானைக்கால் பாதிப்பு ஏற்பட்டிருக்கும் நிலையில் இரவில் தூங்கும் போது கால்களில் வீக்கம் ஏற்படும். காலையில் எழுந்தவுடன் இந்த வீக்கம் குறைந்து கால்கள் சாதாரண நிலைக்கு வந்துவிடும்.

      3 வது நிலையில் இரவில் கால்களில் ஏற்படும் வீக்கம் பகலிலும் இருக்கும்.வீக்கம் வடியாது. 4 வது கட்டத்தில் கால்களில் ஏற்படும் வீக்கம் மேலும் மேலும் பெரிதாக மாறி கால்களில் மொறம் போன்ற வறண்ட மடிப்புகள் காணப்படும். இந்த மடிப்புகளில் வெடிப்பு விழுந்து நீர் வடியும். புண்ணாக மாறும். இந்த நிலையில் இதிலிருந்து வீசும் துர்நாற்றம் சகிக்க முடியததாக இருக்கும். இந்த நிலைக்கு முன்னதாகவே இந்த நோயாளிகளை இவர்களது உறவினர்கள் வீடுகளை விட்டு வெளியேற்றி விடுகின்றனர். அது தான் பரிதாபம்

      இதில் உள்ள விசித்திரம் என்னவென்றால், இந்த கியூலக்ஸ் கொசு கடித்த 8 ஆண்டுகள் கழித்து தான் யானைக்கால் நோயின் தாக்கம் அறிகுறியாக வெளியில் தெரியவருகிறது என்பது தான். அதற்குள் காலம் கடந்துவிட்டிருக்கிறது. அதாவது நோய்க்கிருமிகள் மனிதனின் உடலில் ஆழமாக வேரூன்றி விடுகின்றன. ஆனாலும் மனித குலம் இதற்கு மிரளுவதில்லை. யானைக்கால் நோயின் முதல் இரண்டு கட்டங்கள் அறிகுறிகள் இருக்கும் வரை தெளிவாக அடையாளக்குறிகளை கண்டுபிடித்து விட்டால் இந்த நோயானது மூன்றாம் மற்றும் நான்காம் கட்டங்களுக்கு போகாமல் கட்டுப்படுத்திவிடலாம். ஆனால் யானைக்கால் நோய்க்கான அடையாளத்தை விட்டு விட்டு வேறு ஒரு நோய்க்கான அறிகுறி என்று நினைத்து தவறுதலாக வைத்தியம் செய்து வந்தால், இந்த நோயானது மெல்ல மெல்ல மேலும் தீவிரமாவி விடும்.

      ஆனால் எதார்த்தில் அது தான் நடந்து விடுகிறது. இந்த யானைக்கால் நோய் பற்றி சிகிச்சை அளிக்க இன்றைய மருத்துவ உலகில் ஸ்பெசாலிட்டி டாக்டர்கள் குறைவு என்று ஏற்கனவே சொன்னேன். இநத நோய் பாதிக்கப்பட்ட பலரும் பொதுவான மருத்துவர்களிடம் சிகிச்சைக்கு போகிறார்கள்.

      குறிப்பாக யானைக்கால் நோயின் முதல் இரண்டாம் அறிகுறிகளில் இடுப்பும், காலும் சேரும் இடத்தில் நெறி கட்டிய வலி மற்றும் ஓதம் இறங்குதல் போன்ற அறிகுறிகள் இருக்கும். இந்த அறிகுறிகளை சரியாக கவனியாமல் விட்டு வலி மாத்திரைகளையும், ஒதத்திற்கான அறுவை சிகிச்சையையும் செய்து விட்டுவிடுவார்கள். ஆனால் இதற்கடுத்து கால்கள் இன்னும் பயங்கரமாக வீங்கிவிடும். அப்போது தான் தெரியும் இது யானைக்கால் நோய் என்று.

      ஆனால் ஒரு துரதிர்ஷ்டம்...இன்று வரை மருத்துவ உலகில் இப்படி வீங்கி நாறி அழுகும் நிலையில் உள்ள யானைக்காலை குணப்படுத்த சரியான வைத்திய முறைகள் இல்லாமல் இருந்தது தான். கடைசி கட்டத்தில் நோயாளியின் உயிரை பணயம் வைத்து பாதிக்கப்பட்ட காலை முழுவதுமாக உடலிலிருந்து வெட்டி எடுப்பார்கள். இது தான் முடிவாக இருந்து வந்தது. ஆனால் உலகத்திலேயே முதன் முறையாக மதுரையை சேர்ந்த டாக்டர்.கார்த்திக் இதற்கென்று நவீன அறுவை சிகிச்சையை கண்டறிந்து அதை ஏழைகளுக்கு இலவசமாகவும் செய்து வருகிறார். தானமும்,தர்மத்திற்கும் கூட ஒரு எல்லை உண்டு தானே...தமிழ்நாட்டின் பல்வேறு இடங்களில் இருந்தும் இவரை தேடி பல யானைக்கால் நோயாளிகள் வந்த வண்ணமிருக்கிறார்கள். அனைவரும் நடுத்தர அல்லது மிகவும் ஏழைக்குடும்பத்தை சேர்ந்தவர்கள்.

      இவர்களுக்கு உணவளித்தும்,அறுவை சிகிச்சையின் போது மயக்கவியல் நிபுணர்,எலும்பு அறுவை சிகிச்சை நிபுணர்,தொற்றுநோய் மருத்துவநிபுணர்,பிளாஸ்டிக் சர்ஜன்,பொதுமருத்துவநிபுணர் உள்பட 8 டாக்டர்களின் துணை கொண்டு அறுவை சிகிச்சை மூலம் யானைக்கால் நோயாளியின் மித மிஞ்சிய கால் சதைக்கோளம் அகற்றப்படுகிறது.
      சாதாரணமாக மற்ற மருத்துவர்கள் யானைக்கால் நோயாளியின் காலில் வளர்ந்திருக்கும் அதிக சதைப்பகுதியை மட்டும் தான் அறுவை சிகிச்சை மூலம் அகற்றுவார்கள், ஆனால் இங்கு இந்த நோய்க்கு காரணமாக உடலில் புகுந்திருக்கும் புழுவை தேடி அப்புறப்படுத்தி அதன் குஞ்சுகள் எங்கும் இருக்கின்றனவா என்று அலசி பார்த்து அவற்றையும் ஒழித்து கட்டிய பிறகு தான் அறுவை சிகிச்சைக்கு போகிறார்கள்.

      இப்படி யானைக்கால் நோயாளிகளின் வேதனை தீர்க்கப்படுகிறது. காலம்காலமாக தங்களது கால்களையே தூக்கி சுமக்க முடியாமல் வேதனைப்பட்டு வந்த நோயாளிகள் அறுவை சிகிச்சைக்கு பிறகு புதிய சொர்க்கத்தை கண்டது போல உணர்வதுண்டு. காரணம் உயிருள்ள போதே தங்களை மற்றவர்ள் புறக்கணிப்பதும்,தங்கள் கால்கள் மூலமாக இருந்து வந்த வேதனையும் தான்.

      ஆனால் இப்படி உலகில் முதன்முறையாக நவீன அறுவை சிகிச்சை மூலம் யானைக்கால் நோயாளிகளை குணப்படுத்த டாக்டர்.கார்த்திக் போன்றவர்கள் முன்வந்தாலும் ஒரளவுக்கு மேல் சிகிச்சைக்கான செலவுகளை அவரால் மட்டும் ஏற்றுக்கொண்டு தொடர்நது சேவை செய்வது கடினம்.நாம் டாக்டரை சந்திக்க போயிருந்த நேரத்தில் இரண்டு பச்சிளம் குழந்தைகளுக்கு 34 வயதே ஆன தாயான சாந்தி என்பவர் கடுமையான யானைக்கால் நோயால் பாதிக்கப்பட்டு வந்திருந்தார்.

      சாதாரண கட்டிட தொழிலாளியான தனது கணவரின் வருமானம் போதாதால், தனக்கு இலவசமாக அறுவை சிகிச்சை செய்ய கேட்டு டாக்டர்.கார்த்திக்கை சந்திக்க வந்திருந்தார். லயன்ஸ் கிளப்,ரோட்டரி கிளப் உள்ளிட்டவர்களிடம் முயற்சி செய்து பார்க்கிறேன் என்று அந்த நோயாளி சாந்தியிடம் டாக்டர் சொல்லிக் கொண்டிருந்தார். நமக்கு கண்களில் ஈரம். யானைக்கால் நோயாளியான தன்னிடமிருந்து தனது பச்சிளம் குழந்தைகளுக்கு ஏதாவது ஆகி விடக்கூடாது என்று ஒரு உறவுக்கார பெண்ணிடம் தனது குழந்தைகளை கெஞ்சி கேட்டு தூக்கி கொள்ளுமாறு கேட்டு மருத்துவமனைக்கு வந்திருந்தார்.

      யார் யாரோ செய்த குற்றத்தினால் மாசுபட்டு போன சுற்றுபுற சூழலால் உருவான கொசுக்களின் கடிக்கு பலியாகி இருக்கும் அப்பாவியான சாந்தி போன்றவர்களுக்கு உதவ மனமிருந்தால்............டாக்டர்.கார்த்திக் எம்.டி.,எம்.ஆர்.சி.எஸ்., அவர்களை 97900 06545 என்ற எண்ணிலும் www.gurumithrren.org தளத்திலும் தொடர்பு கொள்ளலாம்.

      டாக்டர்.கார்த்திக் தஞ்சாவூர் மருத்துவகல்லூரியின் முதல் அறுவைசிகிச்சை நிபுணரான டாக்டர். சிவராமன் அவர்களின் பேரனும், சென்னை மருத்துவக்கல்லூரியின் தங்க பதக்கம் வென்ற டாக்டர். சிவசுப்ரமணியத்தின் மகனும் ஆவார் என்பது குறிப்பிடத்தக்கது.

      யானை-வாழ்வியலின் வளமை மற்றும் செழிப்பின் ஒரு உன்னத அடையாளம்

      7 கருத்துகள்



      பார்க்க பார்க்க வியக்க வைப்பது யானை. பார்க்க பிரமாண்டமான உருவாமாக இருந்தாலும் மனிதனின் அடிமையாக ரோடுகளில் பிச்சையெடுப்பதும், கோயில்களில் ஆசிர்வாதம் செய்வதுமாக பரமசாதுவாக இருக்க பழக்கப்படுத்தப்பட்டிருக்கும் யானைகள் ஒரு வகை. காடுகளில் வெட்டப்படும் மரங்களை சுமந்து செல்லும் லோடுமேன் வேலைக்கு இருக்கும் யானைகள் இன்னொரு புறம். இது தவிர மனிதனை எதிர்த்து வரும் காட்டு யானைகளை கட்டுப்படுத்தி மீண்டும் காட்டுக்குள் துரத்தி விட பழக்கப்படுத்தப்பட்டிருக்கும் 'கும்கி' யானைகள் மறுபுறம். இப்படி யானைகளை நாம் பல பரிணாமங்களில் நாட்டிலும், காட்டிலும் பார்க்க முடிகிறது.

      இந்த உலகத்தில் யானைக்கு மேல் மிக பயங்கர உருவத்துடன் இருந்த எத்தனையோ விலங்கினங்கள் இன்று அழிந்து போய்விட்டன. இதில் கடைசி நிலையில் இருப்பது யானைகள் தான். இன்றைக்கு இருக்கும் இந்தியாவின் ஆளும் வர்க்க அரசியல்வாதிகளில் 99 சதவீதத்தினருக்கு அறிவியல் சார்ந்த படிப்பும் அறிவும் இல்லை என்பதை நாடாளுமன்ற உறுப்பினர்களின் பயோடேட்டாவே காட்டுகிறது. இந்த நிலையில் இவர்களுக்கு யானைகள் உள்ளிட்ட எந்த உயிரினத்தின் மீதும் அறிவியல் பார்வையும், ஆர்வமும் இருக்காது என்பதே உண்மை.

      இந்த நிலையில் இவர்கள் இப்படி அழியும் பட்டியலை நோக்கி பயணிக்கும் யானையை காப்பாற்றுவது பற்றியல்லாம் எங்கே சிந்திக்க போகிறார்கள்? இருந்தாலும் உலக இயற்கை பாதுகாப்பு இயக்கங்களின் அழுத்தம்,இந்திய வனஉயிர் வாரிய(மேட்டுக்குடி) உறுப்பினர்களின் மனோபாவம்,இயற்கையை நேசிக்கும் ஆர்வலர்களின் உறுதியான நிலைப்பாடு ஆகியவற்றின் காரணமாக இந்திய மத்திய அரசு கடந்த 1992 ல் 'புரோஜக்ட் எலிபண்ட்' என்ற திட்டததை அறிவித்தது.

      இதன்படி யானை என்னும் பிரமிக்க தக்க விலங்கையும் அதன் வாழ்விடத்தையும் பாதுகாப்பது தான் குறிக்கோள். தற்போது இந்த திட்டம் 18 ஆண்டுகளை கடந்து போய்க் கொண்டிருக்கிறது. இருந்தாலும் இன்னும் ஆங்காங்கே யானைத்தாக்குதல் பற்றி கேள்விப்படத்தான் செய்கிறோம். யானைகள் என்னும் பெரிய விலங்குக்கும் மனிதனுக்கும் எந்த இடத்தில் முட்டல் மோதல் இருக்கிறது? இதற்கு காரணம் என்ன?

      யானைகளின் உணவு,நீர்,வாழிடம் பறி போவதன் காரணமாக யானை கோபமுறுகிறது. தூண்டப்படுகிறது. காடுகளில் ஏற்படும் உணவுத்தட்டுப்பாடு யானைகளை பாதிக்கும் போது மனிதனின் வேளாண் நிலத்தை யானை தேடி வருகிறது. அதாவது அதன் வாழிடமான மலைக்காடுகளை அழித்து டீ எஸ்டேட்களை அமைத்து விட்டால் யானை உணவுக்கு எங்கே போகும். மனிதனின் டீத்தூள் பேராசைக்கு யானையை பட்டினி போட்டால் அது வேறு வழிக்கு இறங்குகிறது.இது தான் உண்மை.
      யானையை ரோட்டில் பார்க்கும் போதும் சர்க்கஸில் பார்க்கும் போது அதன் தோற்றத்தை மட்டும் பார்த்து மகிழ்ந்து விட்டு அப்படி அதை மறந்து விடுகிறோம். அட்லீஸ்ட் விநாயக கடவுளின் உருவத்தை பார்க்கும் போது கூட யானையின் தோற்றம் கண்ணுக்குள் வந்து போவதில்லை. ஆனால் யானையில உடலமைப்பையும் வாழ்க்கை முறையை கொஞ்சம் தெரிந்து கொண்டு யானையை காக்க நம்மால் முடிந்ததை செய்வோம் என்பதற்கு தான் இந்த பதிவு.

      உடலமைப்பு

      யானைகளில் ஆசிய யானை,ஆப்பிரிக்க யானை என்று இரண்டு வகை உண்டு. இந்த இரண்டு யானைகளுக்கும் காதுகள்,கழுத்து மற்றும் நெற்றி போன்றவற்றில் சற்று வித்தியாசம் காணப்படும். யானைகளின் நிறம் கருப்பாக இருப்பதாக தெரிந்தாலும் உண்மையில் கருஞ்சாம்பல் நிறமுடையவை. இருந்தாலும் ஆசிய யானைகளுக்கு (தோலின் மேல் பகுதியில்) இளஞ்சிவப்பு நிறத்தில் அல்லது வெண்மையாக புள்ளிகள் காணப்படும். இது ஒரு வகை நிறமிழப்பு. இது நிறமிக் கோளாறு என்னும் சிறிய நோய்.
      யானையின் தோல் 25 மி.மீ (ஒரு அங்குலம்) வரை தடிப்பானது. இருப்பினும் கூருணர்வு(sensitive) மிக்கது. ஈ,கொசு கடித்தால் கூட சட்டென்று உணர்ந்து கொள்ளும். இந்த சிறிய கொசு, எறும்பு,ஈக்களிடமிருந்த தப்பிக்க தான் இயற்கை யானைக்கு மடிப்பு,சொரசொரப்பு,தடிப்பு,தொய்வு,தளர்வு என்று வித்தியாசமான தோலை தந்துள்ளது.

      இருந்தாலும் ரத்தம் உறிஞ்சும் சில உண்ணிகள்,பூச்சிகள் இந்த தோலின் இடுக்குகளில் புகுந்து கொள்ளும்.யானையின் தோல் மற்ற அடர்த்தியான தோல் கொண்ட காண்டாமிருகம்,நீர்யானை போன்ற விலங்குகளின் தோலை போல் காணப்பட்டாலும் அந்த விலங்குகளின் தோல் அளவுக்கு உறுதியானதல்ல. கெட்டித்தன்ை உடையதும் அல்ல. மென்மையானது. இதனால் தான் மனிதனை கடிக்கும் கொசுவும்,எறும்பும் யானைகளையும் எளிதாக கடித்து ரத்தத்தை உறிஞ்சுகின்றன.

      பூச்சிகள் கடிக்கும் போது யானைகள் பொதுவாக ஒரு குச்சியையோ, சிறு மரக்கிளையையோ ஒடித்து அதனால் சொரிந்து கொள்ளும். அல்லது அரிக்குமிடத்தை ஒரு பாறையின் மீது அறக்கி தேய்த்துக் கொள்ளும். இந்த பழக்கம் மற்ற விலங்குகளை விட யானை அறிவுமிகுந்தது என்பதை காட்டுகிறது. வளர்ச்சியடைந்த யானைக்கு தலையின் உச்சி,வால் பகுதி தவிர்த்து வேறு எங்கும் உரோமங்கள் இருப்பதில்லை. இதை வளர்த்து வயது வந்த யானை என்பதை அடையாளம் கண்டு கொள்ளலாம்.
      தனித்தன்மை வாய்ந்த யானையின் தந்தம் என்பது, யானையின் முன்வெட்டு பற்கள் தான். யானைத்தந்தங்கள் மூன்றில் இரண்டு பங்கு வெளியே தெரிகின்றன. ஒருபங்கு மண்டையோட்டின் உள்ளே பற்குழியினுள் பொருந்தியிருக்கும். ஆசிய யானைகளில் மரபணுக்குறைபாடு காரணமாக தந்தம் இல்லாத ஆண்யானைகள் பிறந்து வளர்வதுண்டு. இவற்றை 'மக்னா' அல்லது 'மோழை' என்று அழைப்பார்கள்.

      ஆசிய யானைகளில் இந்திய ஆண் யானைக்கு மட்டுமே தந்தம் நீண்டு வளரும். பெண்ணுக்கு உதட்டினுள் அடங்கிய சிறு தந்தம் இருக்கும். இலங்யைில் காணப்படும் ஆண்யானைகளில் பெரும்பாலனவற்றுக்கு தந்தங்கள் இல்லை.
      கொம்பு எனத் தவறாக கருதப்படும் இந்த தந்தம் தன் எதிரிகளுடன் போராடவும்,மற்ற ஆண்யானைகளுடன் சண்டையிடவும் ஒரு ஆயுதமாக இருக்கிறது. மற்றும் பெண் யானைகள், ஆணின் உடல் வலுவை கணிக்க ஒரு கவர்ச்சி உறுப்பாகவும் உள்ளன.

      மேலும் உண்ணத்தக்க உவர் மண்ணை தோண்டி எடுக்கவும்,நீருக்காக ஊற்றுக்குழி பறிக்கவும்,மரங்களின் பட்டையை உரிக்கவும்,வேர்களை தோண்டி பிடுங்கவும் சிறு கிளையை முறிக்கவும் உதவுகிறது. தந்தங்கள் யானையின் ஆயுள் முழுக்க வளர்கின்றன.
      யானையின் துதிக்கை தனிச்சிறப்பானது. இது நீண்டு வளர்ந்து விட்ட மேல்உதடும் மூக்கும் சேர்ந்த பகுதி தான் துதிக்கை. இது மீள்விசை கொண்ட தசைநார் வளையங்களால் ஆன சுருள்வில் தன்மையுடன், திறன் மிக்கவையாகவும் மூக்காகவும் இயங்குகிறது.

      இதனால் இலைகள்,தண்ணீர்,புழுதி,புல், மண் போன்றவற்றை பறிக்கவும்,பிடுங்கவும்,வாரவும் எடுத்து உடலின் மீது போட்டுக்கொள்ளவும் முடிகிறது.நன்கு மோப்பம் பிடிக்கவும், கோபத்தை,மகிழ்ச்சியை வெளிப்படுத்தவும்,ஒரு ஊது கொம்பு போல 'வீர்' என்ற ஒலி எழுப்பவும் தும்பிக்கை பயனாகிறது.

      யானையின் தும்பிக்கை 1,50,000 தனித்தனி தசை நார்,நரம்பு கொண்ட கட்டமைப்பினால் ஆனது. இதனால் ஒரு நாணயத்தை கூட எடுக்க முடியும்.ஒரு சிறிய புல்லை தனியாக பிடுங்க முடியும்.முட்செடி,கொடி,மரங்களின் பட்டையை உரிக்கும் போது அதன் சிலாக்குகள் எதுவும் கிழித்து காயப்படுத்ததவாறு லாவகமாக இயங்க முடியும்.யானையினங்கள் எல்லாம் இரு துவாரங்களையுடைய தமது தும்பிக்கையின் நுண்ணுர்வுமிக்க விரல் நுனியால் ஒரு இலை, தழை, பொருளை உண்ணத்தக்கதா, தகாததா என்று நன்றாக புரிந்து கொள்ளும்.

      பெருந்தலையை திருப்பாமலேயே எல்லா திசைகளிலும் தும்பிக்கையை சுழற்றி தமது பகைவிலங்கு,மற்ற விலங்குகள் அல்லது நீர் இருக்கும் திசை ஆகியவற்றை 5 கி.மீ தூரத்தில் இருந்தால் கூட கண்டுபிடித்து விடும்.
      தும்பிக்கை என்பது யானைக்கு உயிர்நாடி போன்றது. தும்பிக்கையில் காயம்பட்டலோ, துண்டிக்கப்பட்டாலோ யானை உயிர்வாழ்வது சிரமமாகிறது. யானைக்கு 26 பற்கள் வரை இருக்கும். சுவையுணர்வை பொறுத்த மட்டில் யானைக்கு இனிப்பு,கசப்பு எல்லாம் தெரியாது. அவற்றுக்கு சுவை நரம்பு இல்லை. மணம்,மென்மை,சாறு,அளவு,பசி என்ற அடிப்படையில தான் அவை உணவை உண்கின்றன.

      இது போல் முன்னோக்கி பார்ப்பதை விட பக்கவாட்டு பார்வையை தான் யானை பெரிதும் நம்பி இருக்கிறது. ஒரு யானை தனது பார்வையை விட கூர்மையான கேட்பு சக்தியையும் நுட்பமான மோப்ப திறனையும் நம்பி வாழ்கிறது. காட்டு யானகைள் ஒரு நாளில் 18 மணி நேரத்தை உணவு தேடி தின்பதில் தான் செலவிடும். குட்டியானைகள் அதிகமாக உறங்குவதுண்டு. வளர்ந்த யானைகள் ஆழ்நத உறக்கம் கொள்வதில்லை.

      வாழ்வியல்
      யானைகள் புலிகளை போல் தனித்து வாழும் விலங்கல்ல.15,20 என கூட்டமாக வாழ்பவை.எந்த ஒரு யானை கூட்டத்திற்கும் ஒரு மூத்த பெண் யானையே தலைமை தாங்கி வழி நடத்தும். அந்த தலைவி,காட்டில் நிறைய உணவு கிடைக்குமிடங்கள்,பாதுகாப்பு கட்டுப்பாடு பற்றிய அறிவோடு விளங்கும்.எனவே அது தான் அக்கூட்டத்தின் முடிசூடா முதலமைச்சர்.

      ஒருயானைக்கூட்டத்தில்,பாட்டி,பெரியம்மா,சித்தி,மாமா,சகோதர,சகோதரி,பேரன்,பேத்தி என அனைத்து உறவுகளும் இருக்கும். ஆண் யானைகள் கூட்டத்தில் 12 முதல் 15 வயது வரை சேர்ந்திருக்கும். பின்னர் அவை விலகிச் செல்கின்றன. அல்லது விலக்கப்படுகின்றன. இது போன்ற நிலைப்பாடுகள் நெருங்கிய உள்ளினப் பெருக்கம் (inbreeding) நடைபெறாமல் தடுக்கவே ஏற்பட்டுள்ளன எனலாம்.

      ஒரு யானைக்கூட்டம் நிரந்தரமாக ஒரு இடத்தில் தங்கி வாழும் பண்புடையதல்ல. சுற்றித்திரியும் வாழ்க்கையை கொண்டது. தங்களுக்கென ஒரு மேய்ச்சல் பகுதியை தேர்வு செய்து கொண்டு அதைப்பயன்படுத்தும். இந்த மேய்ச்சல் பகுதி பல நூறு சதுர கி.மீட்டர் பரப்பளவு கொண்டதாக இருக்கும். ஒரு இடத்தை அடையாளப்படுத்தி அதைக்கணக்கிட்டு காத்திருந்தால் ஆண்டுக்கு ஒரு முறையாவது அந்த பாதையில வந்து போவதை பார்க்கலாம். அவ்வாறு வந்து போகும் வேளையில் அவற்றின் மேய்ச்சல் பகுதிக்கு மனிதரால் இடையூறு வரும் போது,வேளாண் பயிர் மேய்தல் போன்ற நிகழ்வுகள் ஏற்படுகின்றன( அதாவது மனிதர்களின் தோட்டத்திற்குள் புகுந்து சாப்பிடுதல்). இதை தான் நாம் யானைகளின் அட்டகாசம்,நாசம்,படையெடுப்பு,துவம்சம்,கும்மாளம் என்கிறோம்.

      யானைக்கூட்டத்திற்கு ஒரு பெண் யானை தான் தலைவியாக இருந்து வழிநடத்தினாலும் விதிகள்,கட்டுப்பாடு மற்றும் பழக்க வழக்கங்களை கடைப்பிடிப்பதில் இளம் குட்டிகள் தவிர்த்து யானைகளுக்கும் பொறுப்புண்டு. தாய் யானைகள் மற்ற எல்லா குட்டிகளிடமும் அன்பு காட்டும். பாலும் தரும். இன்னும் ஆற்றை கடக்க உதவுதல்,இலைகளை பறித்து போடுதல்,ஊனுண்ணிகளிடமிருந்து தப்பித்தல் போன்ற எல்லாவற்றுக்கும் உதவும்.

      ஒரு யானைக்கூட்டத்தில் இருக்கும் யானை மற்ற தனது கூட்ட யானையை அடையாளம் கண்டு கொள்ள அவற்றின் ஒலி,கழிவுப்பொருள்,உடலசைவு மொழி வழியாக தெரிந்து கொள்ளும். இதன் மூலம் அடையாளங்களை உணர்த்தி, உணர்ந்து,துல்லியமாக,முழுமையாக புரிந்து கொள்ளும். ஆனாலும் யானைகளின் வியப்புக்குரிய சங்கதியாக இருப்பது அதன் கேளா ஒலி உரையாடல்கள்.அதாவது யானைகள் தங்களுக்குள் இன்ப்ரா ரெட்(infra red) அதிர்வுகளால் ஆன ஒரு மொழியில் தொலைவிலுள்ள மற்றொரு யானைக்கூட்டத்துடன் தொடர்பு கொள்வதாக ஆய்வாளர்கள் கண்டறிந்தள்ளனர்.

      நம்மைப் போலவே யானைகள் அதன் அளவுக்கு மேல் சிந்தித்தல், செயல்படுதல்,பிரச்சனையைசமாளித்தல்,புரிதல்,நினைவாற்றல்,வருந்துதல்,பிரிவு,மகிழ்ச்சி,ஏமாற்றம்,பரிவு,கோபம் என பல மனநிலையை பெற்றுள்ளன. ஆனால் மனிதருக்கு உள்ளதை போல்
       சுயநலம்,வஞ்சனை,பழிவாங்கல்,தாக்குதல்,கொள்ளை,கொலை,அட்டகாசம்,போக்கிரித்தனம் போன்ற எதுவும் இவைகளிடம் இல்லை.

      மழை,குளிர்,பனியை பொருட்படுத்தாமல் ஏறக்குறைய 8000 அடி உயரம் உடைய மழைக்காடுகள் முதல் கடற்கரையோர காடுகள் வரை யானைகள் காணப்படுகின்றன. ஆனாலும் மலையடிவார சமவெளிக்காடுகள் தான் யானைகளுக்கு பிடித்தமானவை.கூட்டத்திலிருந்து விலகி வாழும் வயதான யானை தமது நீண்ட வாழ்நாளின் கடைசிக்காலத்தில் காட்டின் அமைதியான சூழலில் உணவும்,நீரும்,நிழலும் கிடைக்கும் செழிப்பான இடத்தில் ஒதுங்கி விடுகின்றன. பல் வளர்ச்சி முடிந்து,கடைசிப்பல்லும் தேய்ந்து விழுந்து விடும் போது, இளம்புல் மற்றும் இலைக்கொழுந்துகளை மட்டும் தின்று வாழும். அடிக்கடி கீழே படுத்துக் கொள்ளும்.மெல்ல மெல்ல எழுந்து நிற்க முடியாமல் அவதிப்படும். உணவு எடுத்துக் கொள்வது குறைந்து போய் கடைசியில் உடல் பலவீனப்பட்டு மெலிந்து போகும்.

      அப்போது சுவாசம் குறையும். தும்பிக்கை நுனியை மட்டும் அசைக்கும்.மற்ற உறுப்புகளை அசைக்க முடியாதபடி சில நாட்கள் படுத்துக் கிடந்து கண்களில் ஒளி இழந்து இறுதியாக தனது நீண்ட கால மூச்சை நிறுத்திக் கொள்ளும்.
      தமிழகத்தில் இந்த தும்பிக்கை நாயகன்கள் களக்காடு, முதுமலை,ஆனைமலை சரணாலயங்களில் தான் அதிகம் தப்பி பிழைத்திருக்கின்றன. யானை இருக்கும் இடங்கள் செழிப்பானதாக இருக்கும் என்பது இயற்கை உண்மை. யானை தனது சாணங்கள் மூலம் ஏராளமான தாவரங்களையும்,மரங்களின் விதைகளையும் காடு முழுவதும் பரப்பி காடுகளுக்கு உயிரூட்டுகின்றன. அதனால் காடுகளில் நூற்றுக்கணக்கான தாவர, விலங்குகளும் சிறப்பாக வாழ முடிகிறது. இவற்றில் பூச்சிகள்,தவளைகள்,பாம்புகள், ஆமைகள்,காட்டுப்பூணை,முயல்,முள்ளம் பன்றி,நீர்நாய் போன்ற சிறு விலங்குகளுடன் உயிரின அட்டவனையில் உச்சியில் உள்ள புலி,சிறுத்தை,கரடி,காட்டெருமை,மான்கள் ஆகியவற்றுக்கும் யானைகளலேயே வளம் பகிர்நது அளிக்கப்படுவதாக ஆய்வுகள் சொல்கின்றன.


      வெற்றியின் உருவம் விநாயகன்
      பெருத்த உருவத்தை உடைய கடவுளான கணபதி சிறிய உருவமாகிய எலியின் மீது தான் அமர்ந்திருப்பது வழக்கம். இது ஏன் என்பது இன்னும் பலருக்கு புரியாத புதிர். இது ஏன் என்பதற்கு சில வரலாற்று குறிப்புகளிலிருந்து விடை காணலாம்.
      குப்தர் காலமான கி.பி.6 ம் நூற்றாண்ட்டில் தான் விநாயகர் விநாயகர் தோற்றுவிக்கப்படுகிறார். கணபதி என்ற சொல்லின் பொருள் 'கணங்களின் கடவுள்' என்பதாகும். சில வேளைகளில் 'கணங்களின் தலைவன்' என்றும் பொருள் கொள்ளலாம். கணேசன் என்பதை கணா-ஈசன் எனலாம். அக்காலத்தில் "கணநாயகா" என்றே விநாயகனை குறித்தனர். ரிக் வேதத்தில் கணபதி என்ற ஒரு சொல் ஒரு படைத்தலைவனை குறிக்கிறது. மேலும் கணா என்ற வடமொழிச்சொல்லுக்கு தமிழில் குலம் என்று குறிப்பிடலாம்.
      அந்த வழியே ஆதிமக்கள் சிலர் தங்கள் புராண விலங்குகள் தாவர,பறவை மூதாதையர்களிடமிருந்து உதித்ததாக நம்பினார்கள். இந்த நம்பிக்கைகளின் அடிப்படையில் உருவானவையே யானைக்குலம்,எலிக்குலம் போன்றவை.இதற்கு பல எடுத்துக்காட்டுகளை வரலாற்றில் காணப்படுகின்றன.மாதங்கர் என்ற வடஇந்திய பழங்குடி மக்களின் குலக்குறி யானையாகும். (மாதங்கி என்றால் யானை).லலிதா விஸ்தரகா என்ற புத்த நூல், பசநாதி என்ற கோசல நாட்டு அரசனை யானை விந்திலிருந்து தோன்றியவனாக சொல்கிறது. கொங்கு வேளாளர்களிடம் மாதங்கம் என்ற உட்சாதி பிரிவு உள்ளது. நீலகிரியில்  குறும்பர் பழங்குடியின் குலங்களில்'யானைக்குலம்' என்று ஒன்று உள்ளது.
      தென்னிந்தியாவில் மூசிகர் பிரிவு என்ற ஒன்று இருக்கிறது. மூசிகம் என்றால் சமஸ்கிருதத்தில் எலி. இந்திய ஆதிவாசிகள் பிரிவு சிலவற்றுக்கு எலி குலக்குறியாகும். கொங்கு வெள்ளாளர்களில் குண்டெலிக்கூட்டம் என்பது ஒரு பிரிவு. சுண்டெலி,வெள்ளெலி,முள்ளெலி,மூஞ்செலி என்ற எலி இனங்கள் போல முகட்டெலிக்கு குண்டெலி என்று பெயர். இந்த எலி வீட்டின் கூரையில் வாழும். இது வீட்டு பொருள்களை தின்று வாழ்வதால் நன்றாக கொழுத்திருக்கும்.
      ஒரு குலத்தினர் மற்றொரு குலத்தினருடன் போரிட்டு வென்றால் தோற்றவரின் குலக்குறி அழிக்கப்படும். அல்லது அடிமைப்படுத்தப்படும். ஆக யானையைக் குலக்குறியாக கொண்ட பழங்குடி கூட்டம் எலியை குலக்குறியாக கொண்டிருந்த கூட்டத்தை போரிட்டு வென்று வெற்றியை நிலைநாட்டும் அடையாளமாக யானைக்கு வாகனமாக்கியுள்ளனர். ஆக,விநாயகர் என்பதை வெற்றி கொள்ளும் கூட்டத்தின் அடையாளமாக்கியுள்ளனர்.

      ஆக..மனிதன் எப்படி ஒரு உறவு முறையாக வாழவேண்டும் என்பதை தனது வாழ்க்கை முறை மூலம் விளக்கும் யானையை நாமும் விநாயகன் போல் சற்று நேரம் சிந்தித்து அவை வாழ வழி தருவோம்.


      திரு.முகமதுஅலி மற்றும் யோகனந்த் ஆகிய யானை பாதுகாப்பு ஆர்வலர்கள் எழுதிய 'அழியும் பேருயிர்:யானைகள்' என்ற நூலிலிருந்து

      வெளியீடு: இயற்கை வரலாறு அறக்கட்டளை,ஆல்வா மருத்துவமனை,அம்பாராம் பாளையம்,பொள்ளாச்சி-642 103.போன் 98941 40750

      தேனீக்கள் இல்லாவிட்டால் மனித இனம் அழிந்து போகுமா?

      6 கருத்துகள்



                                                                                                                                                                டிஸ்கவரி சேனலில் ஒரு நிகழ்ச்சியில் இந்தியகாட்டுப்பகுதிகளில் உள்ள மலைகளில் தேன் எடுப்பதை படம்பிடிக்க அந்த சேனலின் படபிடிப்புக் குழுவினர் வந்திருந்தார்கள். அந்த காடுகளில் உள்ள பழங்குடி மக்கள் 2 ஆயிரம் அடி உள்ள மலைகளில் எந்த அளவுக்கு கடினப்பட்டு ஏறி தேனை எடுக்கிறார்கள் என்பதை காட்டியது அந்த சேனல்.
      இன்றைக்கு மேற்குவங்காளத்திலும் மற்ற சில இடங்களிலும் பழங்குடி மக்கள் தங்கள் நிலங்களை காக்க கடும் போராட்டத்தில் ஈடுபடுகின்றனர். காரணம் அந்த காடுகள் அவர்களின் வாழ்விடங்கள்.
      அங்கு இருக்கும் மூலிகைகளும், மரங்களும்,தேனும் அவர்களின் வயிறுகளுக்கு உணவிடுகின்றன.நகரத்தில் தேனீக்கள் கூடுகட்ட போவதில்லை.தேனீக்கள் நகரத்தின் பரபரப்பில் இருப்பது இல்லை.
      காடுகளின் அமைதியான சூழலில் இருந்து தான் பல அரிய பொருட்கள் மனிதனுக்கு கிடைக்கின்றன.மனிதனின் உடல் நலனை காக்கும் பல பொருட்கள் காடுகளிலிருந்து கிடைக்கின்றன. அவற்றில் தேன் அதிசயமான ஒரு அமிர்தம்.

      தேன் எடுத்து வந்து நாம் உண்டு விடுகிறோம். தேனீக்களின் உணவான அவை தேனீக்கு கிடைக்காமல் போகிறது. ஆனால் தேனீக்கள் அவற்றை பற்றி கவலைப்படுவதில்லை. அடுத்த இடத்தில் கூடுகட்ட போய்விடுகின்றன. தேனீக்கள் பார்க்க உருவத்தில் சிறிது தான். ஆனால் அவற்றின் வாழ்க்கை முறையும், அவை மனிதனுக்கு கற்றுத்தரும் பாடமும் ஏராளம். ஆனால் நாம் தான் அதை கடைப்பிடிப்பதில்லை. அவற்றை காக்கவும் முன்வருவதில்லை. சமீபத்தில் தமிழ்நாட்டின் ஒரு விமான நிலைய உயர் அதிகாரியுடன் பேசிக்கொண்டிருந்தேன்.அப்போது அவர் வீட்டில் சில தேன்கூடுகளை வைத்து தேனீக்களை வளர்ப்பதை பற்றி சொன்னார். பிரமித்து போனேன். எப்போதும் பிசியாக இருக்கும் இவரா தேனீக்களை வளர்க்கிறார் என்ற ஆச்சரியமாக இருந்தது.
      அவர் தேனீக்களை பற்றி சொன்னது மிகவும் ஆச்சரியப்படத்தக்க தகவலாக இருந்தது. இதோ....


      பெண்ணின் ஆட்சி
       " தொடக்க காலத்தில் மனித வாழ்க்கையில் பெண்களுக்கு தான் முக்கிய இடம் இருந்தது. அதாவது தாய்வழிச்சமுதாயம் என்று நாம் கேள்விப்பட்டிருக்கிறோம். அது தான். பெண்கள் தான் ஆங்காங்கே இருந்த மனித குழுக்களின் தலைவியாக இருந்திருக்கிறாள். விவசாயம் உள்ளிட்டவைகளில் அவர்கள் தான் ஈடுபட்டு அந்த குழுக்களுக்கு உழைப்பதற்கான வழியை காட்டியிருக்கிறார்கள். காலப்போக்கில் பெண்ணடிமை சமுதாயம் உருவாயிருக்கிறது. ஆனால் தேனீக்கள் குழுவில் அன்றிலிருந்து இன்று வரை பெண்களின் ஆட்சி தான்.
      தேனீக்களில் குடும்பத்தில்(காலனி) ராணி தேனீ, ஆண்தேனீ,வேலைக்கார தேனீ என்ற மூன்று வகையான தேனீக்கள் இருப்பதுண்டு. இதில் வேலைக்கார தேனீக்கள் பூக்களுக்கு சென்று தேனை எடுத்து வந்து கூட்டில் சேர்க்கும். ராணி தேனீ முட்டையிட்டு தேனீக்களை உற்பத்தி செய்து கொண்டே இருக்கும். ஆண்தேனீ வழக்கமான சோம்பேறி என்று வைத்துக் கொள்ளலாம்.

      தேனில் பலவகை இருக்கின்றன. ஒவ்வொன்றும் குணத்தில் மாறுபட்டவை.மாமரம், வேப்பமரம் போன்ற மரங்களின் உச்சாணிக் கொம்பில் கூடுகட்டி இந்த மரங்களின் பூக்களில் தேன் எடுக்கும் தேனீக்களின் தேனுக்கு கொம்புத் தேன், மலை உச்சியில் யாரும் தொட முடியாத தூரத்தில் இருந்து கொண்டு பலவகையான காட்டு மரங்களில் எடுக்கும் தேனுக்கு மலைத்தேன் என்று பெயர். இப்படி இருக்கும் இடத்திற்கு ஏற்றபடி தேன் பல பெயர்களை கொண்டிருக்கிறது.இது ஒரு புறமிருக்கட்டும்.

      இந்த தேனீக்கள் பூக்களுக்கு பூக்கள் சென்று தேனை எடுக்கும் போது தான் மனித குலம் வாழ தேவையான காய்கனிகள் உற்பத்திக்கான செயல்பாடு தொடங்குகிறது. இந்த தேனீக்கள் பூக்களில் அமரும் போது அந்த பூக்களில் இருக்கும் மகரந்தங்கள் அவற்றின் கால்களில் ஒட்டிக் கொள்கின்றன. ஆண்மகரந்தங்கள் இப்படி தேனீக்களின் கால்களில் அமர்ந்து பயணம் செய்து மற்றொரு பூவின் பெண் சூலகத்தில் போய் அமரும் போது பூக்களின் கருவுறுதல் நடைபெறுகிறது. பூக்கள் காய்களாக மாறி கனிகளாக மாறுகின்றன. ஆக...மனிதனுக்கு வேண்டிய காய்கறிகள் உற்பத்தியாவதற்கு தேனீக்கள் மறைமுகமாக உதவி செய்கின்றன. இதை தாவரவியலாளர்கள் அயல் மகரந்த சேர்க்கை என்கிறார்கள். அதாவது நமது உறவு முறையை விட்டு விட்டு தூரத்து உறவு முறையில் காதல் திருமணம் செய்து போல, எங்கோ பல மைல் தொலைவில் இருக்கும் இரண்டு செடிகளின் பூக்களை தனது கால் என்னும் காதலால் இணைக்கின்றன இந்த தேனீக்கள்.அதாவது 
       நாள் தோறும் கோடிக்கணக்கான மலர்களை சென்று அமர்ந்து தேனை எடுக்கும் தேனீக்கள் பூக்களை கருவுர செய்ய உதவும் தூதுவனாக இருக்கின்றன. ஆக...தேனீக்களால் நாள் தோறும் பல கோடி மலர்கள் பூவிலிருந்து காயாக மாறும் நிகழ்வுக்கு போகின்றன.

      தேனீக்கள் இல்லாமல் போனால்...
      ஆக...இதிலிருந்து தெரிய வருவது, தேனீக்களின் எண்ணிக்கை குறைந்து போனால் அயல் மகரந்த சேர்க்கையும் குறைந்து போகும். பிறகு மனிதனுக்கு தேவையான காய்கறிகள்,பழங்கள் எங்கிருந்து கிடைக்கும்?
      ஒரு  புறம் மக்கள் தொகை கடுமையாக பெருகி வரும் நிலையில் உணவு உற்பத்தி குறைந்து போனால்....என்ன ஆகும்?
      மனித இனமும் அழிய தொடங்கும்.சத்துஇல்லாத உணவுகளால் உடல் நலம் பாதிக்கும்.எளிதாக தொற்று நோய்கள் மனிதனை தாக்கும்.
      பிறகு மானிட குலத்தின் கதி?

      இந்த கேள்விக்கு பல வெளிநாட்டு விஞ்ஞானிகளும் கண்டுபிடித்த ஒரே விடை ...எக்காரணம் கொண்டும் தேனீக்களை அழிந்து போக விடக்கூடாது என்பது தான். ஆக இப்போது வெளிநாடுகளில் பல தனிநபர்கள் கூட தேனீக்களை வீடுகளில் வளர்ப்பதை ஒரு சமூக சேவையாக நினைக்க தொடங்கியிருக்கிறார்கள். சிறிய தேன் கூடுகளை வைத்து தேனீக்களை உற்பத்தி செய்கிறார்கள்.

      புலிபாணிசித்தர்
      இது தவிர தேனீக்கள் உற்பத்தி செய்யும் தேனில் அபரிமிதமான மருத்துவ குணங்கள் நிறைந்து கிடக்கின்றன.தேனை மற்ற பொருட்களுடன் கலந்து சாப்பிட்டால் எந்த பொருளுடன் சேர்த்து சாப்பிடுகிறோமோ அதனை பொருத்து சில நோய்கள் தீரும். ஆனால் சுத்தமான தேனை மட்டும தனியாக சாப்பிடும் போது குறிப்பிட்ட நோய்கள் தீரும்.
      "வாதமொடு பித்தம் மாற்றும்
      மாந்தமெனும் நோயை விரட்டும்
      ஆறுதலென அரும்பசி ருசியூட்டும்
      ஆதலினால் இது கொம்புத்தேனே"
      என்கிறார் புலிப்பாணி சித்தர்.

      அதாவது இதற்கு பொருள், வாதம் என்ற நோயால் முகம் மட்டும் சிலருக்கு குளிர்காலத்தில் ஒரு பக்கமாக இழுத்துக் கொள்ளும் வியாதி வரும். இதை கொம்பு தேன் தீர்க்கும். சிலருக்கு காசு உழைக்காமலே கொட்டோ கொட்டென்று கொட்டும். இவர்கள் வாய்க்கு ருசியாக சாப்பிட்டு விட்டு அப்படியே படுக்கையில் கிடப்பார்கள். இதற்கு மாந்தம் என்று பெயர். இந்த மாந்தத்தை விரட்டும். பல மனக்கோளாறு,உடல் கோளாறுகளால் பலருக்கு பசி என்பதே இருக்காது. இவர்களுக்கு பசியை வரவழைக்கும். நாக்கின் ருசியையும் அதிகப்படுத்தும்.

      இது தவிர சித்த மருத்துவம் சொல்வது...
      தேனை தனியாக சாப்பிட்டால் பலன்
      • தேன் சீரண சக்தியை தரும். இரைப்பையில் ஏற்படும் எல்லாவித கோளாறுகளையும் வயிற்றில் ஏற்படும் கோளாறுகளையும் குணமாக்கும். நெஞ்சில் ஏற்படும் எரிச்சல், இருதயத்தில் ஏற்படும் வலி,பலவீனம் ஆகியவற்றை போக்கும்.
      • குடலில் ஏற்படும் புண்களை(அல்சர்) ஆற்றும். கல்லீரலில் ஏற்படும் நோய்களை போக்கும்.
      • தேனைக்குறைந்த அளவு அருந்தினால் மலச்சிக்கலை போக்கும். அதிக அளவு அருந்தினால் மலச்சிக்கலை உண்டு பண்ணும்.
      • பேதியை நிறுத்தும்.ரத்தசோகையை போக்கும்(இந்திய பெண்கள் 50 சதவீதத்திற்கும் மேலானவர்கள் இந்த ரத்தசோகையால் பாதிக்கப்பட்டுள்ளனர்),நரம்புகளுக்கு வலிமையை தரும். நீர்க்கோவையை சரி செய்யும். சிறுநீர்க்கழிவை குறைக்கும்.
      • தோல் சம்பந்தமான நோய்கயை போக்கும். இரத்தத்தை சுத்தப்படுத்தும். கிருமி,நாசினியாக வேலை செய்யும்.பற்கள்,கண்கள் ஆகியவற்றுக்கு பலம் தரும். தொண்டையில் ஏற்படும் தொற்றுநோய்,வலியை குறைக்கும்.
      • உடல்குண்டானவர்களை மெலிய செய்யும்.உடலுக்கு ஊட்டச்சத்து தரும்.சுவாச காச நோய்களை குணமாக்கும். விக்கல் நோயை போக்கும்.
      • உடலில் விஷம் இருந்தால் முறிக்கும். சூலரோகங்களை போக்கும்.உடலையும் உள்ளத்தையும் சுறுசுறுப்பாக இயங்க செய்யும். நீண்ட ஆயுளை தரும். பெண்களின் கருப்பையில் இருக்கும் நோய்களை குணப்படுத்தும். குழந்தைகளை ஊட்டத்துடன் வளர்க்க பயன்படும்.

      சரி..தேனை குளிர்ந்த நீருடன் கலந்து பருகினால் அதன் நோய்தீர்க்கும் குணம் மாறும்.அதை பார்க்கலாம்.
      • தேனுடன் குளிர்ந்த நீரை கலந்து அருந்தினால்(மண்பாணை தண்ணீர் சிறப்பு) அருந்தினால் உடலின் ஊளைச்சதை குறையும்.களைப்பு உடனே நீங்கும்.
      • தேனுடன் காய்ச்சிய பசும்பாலை கலந்து அருந்தினால் உடல் வலிமை அடையும்.தாதுவிருத்தி ஏற்படும்.
      • ஆட்டின் பாலை வடிகட்டி தேனுடன் அருந்தினால் உடலுக்கு தேவையான ரத்தத்தை ஊறச்செய்யும்.
      • ரோஜா இதழ்கள் கல்கண்டு,தேன் ஆகியவற்றை கலந்து தயாரிக்கும் குல்கந்தை சாப்பிட்டால் உடலின் சூடுதணிந்து உடல் குளிர்ச்சியடையும்.
      • 100 மிலி பசுவின் பாலையும், 100 மிலி தண்ணீரையும் கலந்து இரண்டு தேக்கரண்டி தேன் கலந்து சாப்பிட்டால் உடலில் மறைந்திருக்கும் நோய்க்காரணங்கள் மறைந்து போகும்.
      • காய்ந்த திராட்சை பழங்களை தேனில் ஊறவைக்க வேண்டும். ஊறியவுடன் காலை மாலை ஒரு தேக்கரண்டி அளவு சாப்பிட்டால் உடல் அழகு பெறும்.
      • ஒரு கோழி முட்டையை உடைத்து ஒரு பாத்திரத்தில் ஊற்றி அதில் ஒரு தேக்கரண்டி தேன்கலந்து அருந்தி விட்டு உடற்பயிற்சி செய்து வந்தால் உடல் களைப்பு அடையாது. வலிமை அதிகரிக்கும்.
      • அருகம்புல்லை தட்டி கசாயம் எடுத்து தேனைக்கலந்து அருந்தினால் பல நோய்களை குணமாக்கும். களைப்பு என்பதே இருக்காது.
      • கணைச்சூட்டினால் குழந்தைகள் மெலிந்து காணப்படுவார்கள். குழந்தையின் பெற்றோருக்கு பல டாக்டர்களிடம் காட்டியும் ' என்ன சாப்பிட்டாலும் குழந்தை தேறமாட்டேன்கிறதே..' என்பார்கள். இந்த குழந்தைகளுக்கு தினசரி ஆட்டுப்பாலில் இரண்டு சொட்டு தேனை கலந்து கொடுத்தால் கணைச்சூடு நீங்கி குழந்தை அழகு போட்டியில் இடம் பெறும் அளவு குண்டாகிவிடும்.
      • இளநீரில் தேன் கலந்து அருந்தினால் உடல் சூடு சட்டென்று தணிந்து போகும்.
      • அத்திப்பழங்களை 48 நாட்களுக்கு தேனில் ஊறவைத்து(இது சர்வோதாய சங்கங்களில் கிடைக்கும்) தினசரி ஒன்றிரண்டு சாப்பிட்டால் உடல் வலிவு பெறும்.
      • மஞ்சள் காமாலை உள்பட காமாலைநோய் கண்டவர்கள் தினமும் தேன் சாப்பிட்டால் காமலை குறைவதுடன் பின்விளைவுகளும் இருக்காது.
      • இஞ்சியை இடித்து சாறு எடுத்து சிறிது நேரம் வைத்திருந்து அது நன்றாக தெளியும். இந்த தெளிந்த சாறில் தேன் கலந்து அருந்தி வந்தால் வயிற்று செரிமானம் சரியாகும். உண்ட உணவு உடனே செரித்து விடும். எங்காவது ருசியாக இருக்கிறதே என்று கண்டதையும் சாப்பிடுபவர்கள் உடனே இதை செய்தால் சீரணம் உடனே உறுதி.

      பெண்களின் முக அழகுக்கு தேன்
      வெள்ளைக் கோதுமை மாவு ஒரு கரண்டி அதனுடன் தேன் கலந்து சில துளிகள் பன்னீரையும் விட்டு நன்றாக பிசைந்து, பின்பு இன்னும் பன்னீர் விட்டு கொஞ்சம் பிசைந்து முகத்தில் சிறிது நேரம் பூசி வைத்திருக்கவும். அரை மணி நேரம் கழித்து முகத்தை குளிர்ந்த நீரால் கழுவி முகத்தை பருத்தி துணியால் ஒற்றி எடுக்க வேண்டும். வாரத்திற்கு மூன்று முறை எளிதான இந்த முறையை செய்து வர உங்களின் முகம் "கார்னியர் நேச்சுரல்,பேர் அன்ட் லவ்லி,வீகோடர்மரிக்' எல்லாவற்றையும் தோற்கடிப்பது உறுதி. பிறகு உங்கள் முகம் 'விண்ணாடிக்கீழ்க்கடலில் விரிந்து வரும் பரிதியிலே கண்ணாடி ஏரியென கதிர்சாய்க்கும் வட்டமுகம்' ஆக மாறி விடும்.பிறகென்ன....எல்லாம் நலமே!

      பழனிக்கு போகும் உங்கள் நண்பரை மறக்காமல் பஞ்சாமிர்தம் வாங்கி வரச்சொல்லுங்கள். காரணம், முழுக்க முழுக்க தேனுடன் வாழைப்பழமும், பேரீச்சை,நாட்டுச்சர்க்கரை,கல்கண்டு,ஏலக்காய்.சுக்கு( சுக்குக்கு மிஞ்சிய மருந்தும் இல்லை.சுப்பிரமணியனுக்கு மிஞ்சிய கடவுளுமில்லை) கலந்து இருப்பதால் அது நிச்சயம் ஒன்று அல்ல ஐந்து அமிர்தங்களின் தேன் கலந்து கலவை.
      குழந்தைகளுக்கு தினமும் சாப்பாட்டில் முட்டை போட முடிவெடுத்துள்ளது அரசு. இது தவறானது என்பது என்னுடைய கருத்து. காரணம், முட்டையிலுள்ள சால்மொனல்லா உள்பட சில பாக்டீரியாக்கள் எல்லோருக்கும் நன்மை செய்வதில்லை. இதற்கு பதிலாக தேனை தரலாம். 35 மிலி தேனில் இரண்டு முட்டைகளின் சத்தும்,ஒரு கிலோ அளவுக்கு மஞ்சள் முள்ளஙகியின் சத்தும் இருப்பதாக ஆய்வுகளில் நிருபிக்கப்பட்டுள்ளது.

      தேன்கூடு, தேனீக்கள் வளர்க்க விரும்புபவர்கள் மெயில் அனுப்புஙகள், ஆலோசனைகள் அனுப்புகிறேன். தேன்பெட்டி, தேனீக்கள் கிடைக்கும் இடங்கள் மதுரையில் தற்போது ஒரு சில இடங்களில் பெண்களால் தொடங்கப்பட்டுள்ளன. நீங்களும் உங்கள் ஊரில் தொடங்கி இயற்கையை வாழ வழி செய்யலாமே!!

      வீட்டில்  வளர்க்கும் கொசு தேனீக்கள் என்ற வகை தேனீக்கள் யாரையும் கடிப்பது இல்லை எனபது குறிப்பிடதக்கது.மதுரையில் தேனீ விஷ சிகிச்சையை ஒரு சமூக சேவை அமைப்பு அளித்து வருகிறது.அது அடுத்த பதிவில்....

      காப்போம் வாருங்கள்

      Be part of the solution Support WWF-India today